नागरिक लगानी कोषय् कार्यकारी निर्देशक माग

येँ – नागरिक लगानी कोषं कार्यकारी निर्देशक पदया निंतिं विज्ञापन बिउगु दु । निवाः न्ह्यव कार्यकारी निर्देशक रामकृष्ण पोखरेलं राजीनामा बीवं थ्व पद प्वनाच्वंगु खः । कोषया अध्यक्ष महाश्रम शर्मां नं राजीनामा बीधुंकूगु दु । नेकपा अध्यक्ष केपी ओलीया नेतृत्वय् दुगु सरकारं कार्यकारी निर्देशक व अध्यक्षयात मययेकूगुलिं राजीनामा बिउगु खँ धाःगु दु ।

कार्यकारी निर्देशक पदय् खुला प्रतिस्पर्धापाखें पदपूर्ति यायेत्यंगु खः । थुकीया निंतिं असोज २२ गते तकया दुने गोप्य आवेदन बिइत विज्ञापन बिउगु खः । कार्यकारी निर्देशक जुइमंदुपिंसं अर्थ मन्त्रालयया वित्तीय क्षेत्र व्यवस्थापन तथा संस्थान समन्वय महाशाखा सिंहदरबारय् खामबन्दी प्रस्ताव न्ह्यब्वयेत धयातःगु दु ।

स्नातकोत्तर यानाः उद्योग वाणिज्य व बैंकिङ्ग क्षेत्रय् म्होतिं नं राजपत्राङ्कित प्रथम श्रेष्णी, सार्वजनि कनिकायया दशौं तह वा सो सरहया जिम्मेवारीइ च्वनाः ज्या यायेधुंकूम्ह व नीजिपाखे जूसा पुँजी बजार सम्बन्धी संस्थाय् म्होतिं नं झिंन्यादँ तक व्यवस्थापकीय पदय् च्वनाः ज्या यानागु कार्यानुभव दुम्हेसिनं जक कार्यकारी निर्देशक पदय् आवेदन बीफइ ।

आवेदन बीम्हेसिया उमेर स्वीदँ पूवनाः खुइन्यादँ पूमवंनिम्ह जुइमाः । आवेदनया लिसें ५ हजार शब्दं थहां मवंक व्यावसायिक कार्ययोजना नं न्ह्यब्वयेमाः । कोषया कार्यकारि निर्देशकय् थौंकन्हय् निमित्त कार्यकारी जुयाच्वनादीम्ह शुशीलकुमार अर्याल नं आकांक्षी जुयाच्वंगु खँ धाःगु दु ।

सम्बन्धित बुखँ

LEAVE YOUR COMMENTS