हर्निया ः कारण व लक्षण

म्हया गुगुं अंग थःगु खोल अथवा पिलिं पिहां वल धाःसा उकियात हर्निया धाइ । हर्निया मिसातय्त स्वयां अप्वः मिजंतय्त जुइ । हर्निया म्हय् गनं नं जुइफु । तर प्वाथं क्वय्या भागय् अप्वः जुइ । हर्निया अज्याःगु ल्वय् खः, गुकिया उपचार अपरेशनं हे जक सम्भव जू । यद्यपिं छुं छुं सावधानी नालाः थ्व ल्वय्यात तच्वः जुइगुपाखें पनातयेफइ ।

ल्ह्वनीगु अले व्यायाम अथवा शारीरिक श्रम मयायेगु प्रवृत्तिं यानाः हर्निया ल्वय् तीव्र गतिं अप्वया वयाच्वंगु दु । थ्व ल्वय् नकतिनि बूम्ह ह्याउँमचां निसें कयाः उमेर गाक्क दयेधुंकूपिं तकयात गुगुं नं उमेर व अवस्थाय् जुइफु ।

हर्नियाया कारण ः
# हर्नियाया जन्मजात कारण नं जुइफु । गुलिखे मामलाय् थुकिया लक्षण २३ निसें ३० दँया दथुइ अज्याःगु इलय् खनेदइ, गबलय् मांसपेशी कमजोर जुयाच्वंगु जुयाच्वनी ।

# मस्तय्त व मिजंतय्त जन्मजात व आकाझाकां तःधिक जुया वइगु व म्हया तौल अप्वया वइगु कारणं नं थ्व ल्वय् जुइफु ।

# मांसपेशियात माक्व स्वयां अप्वः ईतक सालातल वा तन्के जूगु अवस्थाय् लाना च्वनेत बाध्य यानाबिल, झ्यातुक ल्ह्वन, च्वफाये खिफायेबलय् अप्वः बल यात, आदि कारणं नं थ्व ल्वय् जुइफु ।

# स्वँय् इन्फेक्सन जुयाः मदिक मुसु वयाच्वन अथवा मस्तय्त खिचामुसु वयाच्वन धाःसां नं थ्व ल्वय् जुइफु ।

# गुपिं मनूतय्गु ज्या हे झ्यातुगु ल्ह्वनेगु वा न्हिछि न्हिछि दनाच्वनेगु जुयाच्वनी, अज्याःपिं मनूतय्त नं थ्व ल्वय् जुइगु सम्भावना अप्वइ ।

# प्वाथय् दयाच्वनीबलय् अथवा गुगु ट्यूमर वा अत्याधिक मात्राय् अस्वाभाविक स्राव मुनाच्वन धाःसा नं मांसपेशिइ बांलाक लिच्वः लाकी, अले थ्व ल्वय् जुइगु सम्भावना अप्वइ ।

# म्हय् तसकं दाः खात धाःसा नं थ्व ल्वय् जुइफु ।

#हर्निया अथे ला म्हया गुगुं नं ब्वय् जुइफु अय्नं मुख्य यानाः स्वंगू थासय् थ्व जुइगु सम्भावना अप्वः दु । थुपिं थाय् खः – प्वाथय् दथुइ च्वय्पाखे (Epeigastrie Hernia), त्यपुचा व उकिया जःखः (umbilical hernia) व प्वाः व प्यम्पाया दथुइ (Femaral hernia)।

# मिजंतय्त यक्व उमेर दयेधुंकाः म्हया तौलय् आकाझाकां हिउपाः वइगुया लिसे पोस्टेटया समस्या, मुसु, कब्जियत व च्वफाये थाकुइगु आदि कारणं नं हर्निया जुइगु सम्भावना तच्वइ, छाय्कि थुपिं दक्वं कारणं प्वाथय् अप्वः बल लाःवनीगु खः ।

#हर्नियाया समस्या खला मिजं व मिसा निखलकंयात जुइ, तर मिजंतय्त थ्व ल्वय् मिस्तय्त स्वयां ८ गुणा अप्वः जुइगु सम्भावना दइ । हर्निया ताःई तक अथे जुयाच्वन धाःसा आतापुति तज्याइगु तकं जुइफु ।

#किड्नी वा लीभर फेल जूपिंसं नं हर्निया जुइगु सम्भावना तच्वइ ।

# यदि प्रग्नेन्सीइ प्रोटीन कम काल अथवा पूवंक पोषण काये मखन धाःसा मांसपेशी कमजोर जुयावनी, अले हर्निया जुइगु कारण थ्व हे जुइ ।

# म्हय् गनं सर्जरी जुल, अले अन प्रेसर लाइगु जुयाच्वन धाःसा हर्निया जुइगु आशंका ब्वलनी ।

# सिजेरियन अपरेशनय् प्वाःया दथुइ टाँका तल धाःसा नं हर्निया जुइगु चान्स अप्वइ

थुकिया लक्षण
१) हर्निया जूगु थासय् झ्यातुगु व स्याःगु महसुस जुइगु २) छुं झ्यातुगु ल्ह्वनेबलय् प्वाः मनावइगु ३) च्व–खि फायेबलय् थाकुइगु ४) प्वाःया क्वय्या ब्वय् असामान्य जुइक मनावइगु ५) ताउत दनाच्वनेबलय् व फ्यतुइबलय् स्याइगु ।

सम्बन्धित बुखँ

LEAVE YOUR COMMENTS