आल्मुनियम उद्योगया न्ह्यलुवा उद्यमी बाबुकृष्ण ब्यञ्जनकार

थौंकन्हय् छु शहर, छु गां न्ह्याथासं ततःखागु व्यापारिक भवन जुइमा वा चिचाखागु परिवार जक च्वनीगु छेँ हे छाय् मजुइमा, न्ह्यागु दयेकूसां झ्याः–खापा धाःसा आल्मुनियमया हे तयेगु चलन वयेधुंकूगु दु । दंक लाइगु, फिटिङ्ग यायेत नं अःपुगु सर्वसुलभ जूगुलिं आल्मुनियमया झ्याः–खापाया बजाः तब्या जुया वनाच्वंगु दु ।

नेपालय् थज्याःगु आल्मुनियमया झ्याः–खापा दुहांवःगु नं नीन्यादँ धयाथें दयेधुंकल । सुरु सुरुइ नेपालय् आल्मुनियमया झ्याःखापा दुत हयेगुली न्ह्यःने लाःम्ह छम्ह उद्यमी खः– बाबुकृष्ण ब्यञ्जनकार । भाजु ब्यञ्जनकार सामान्य किसान परिवारय् जन्मे जुयाः, नये–त्वनेया हे समस्या दुगु अवस्थाय् ब्वलनाः नं थःगु हे मेहनत, सुझबुझ, कडा परिश्रमं थःगु हे मेटल उद्योग धस्वाकादीम्ह छम्ह उद्यमी खः ।

थौंकन्हय् वय्कःया बि.के आल्मुनियम एण्ड स्टिल वक्र्स नामं झ्याः–खापा, बार थेंज्याःगु आल्मुनिय व स्टिलया ज्वलं दयेकीगु छगू उद्योग दुसा अब्सु नेपाल प्रा.लि.या नामं आल्मुनियम व स्टिलया डिलर ज्या नं याना वयाच्वनादीगु दु । आल्मुनियम उद्योगय् वय्कलं ज्या यानादीगु हे थ्यंमथ्यं नीप्यदँ दयेधुंकल ।

वय्कलं धयादी, ‘२०५१ सालपाखे जिं आल्मुनियमया ज्या यानाबलय् छगू निगू जक उद्योगतय्सं थुकी ज्या यानाच्वंगु खः । नेपालय् आल्मुनियया झ्याः–खापा दयेकेगु उद्योग सुरु यानापिं मध्ये जिपिं ३ नम्बरय् हे लाः धाःसां जिउ ।’वय्कः आल्मुनियम उद्योगय् थ्यंगु कारण धाःसा वय्कलं थःगु नच्चागु वैंशया इलय् निसें यानादीगु मेटल वक्र्स अथवा नया ज्याया कारणं खः ।

खय्त ला वय्कः छम्ह किसान परिवारय् बूम्ह खः । अथे खःसां वय्कःया ज्या धाःसा मेटल, आल्मुनियमया जुल । वय्कःया मां बाः, दाजु सकलें बुँज्या यानादीपिं खः । ‘मांबाः बुँज्या याइपिं किसान खःसां जिमि थःगु हे बुँ मदु । मेपिनिगु बुँइ ज्या यायेमाः । उकिं उबलय् जिमि तसकं थाकु’ वय्कलं थःगु लजगाःया सुरु सुरुया न्हियात लुमंकाः धयादी, ‘अले जि ०३५ साल पाखे हे काठमाडौं मेटल वक्र्स उद्योगय् ज्या यायेत वना, अन सामान ल्ह्ययेगु निसें ध्यबा उठे याःवनेगु ज्या याना ।

२०३९ सालय् थःथिति दाजुपिंलिसे जानाः थःगु हे गणेश मेटल वक्र्स धकाः छगू कारखाना चायेका । थन थम्हं हे नमुगः ज्वनाः ज्या याना ।’
ल्याय्म्हया वैंश धयागु म्हितेगु, चाःहिलेगु, मोजमस्ति यायेगु धाइ । वय्कःया नं ल्याय्म्हया वैंशय् छम्ह बांलाःम्ह फुटबल कासामि जुयाच्वनादीगु खः । तर वय्कः थःगु उद्योग धस्वाकेगु निंतिं म्हितेगु, चाःहिलेगु त्वःताः उद्यम ज्याय् हे ह्वब्वानादिल ।

उबलय्या थ्व हे त्याग व मेहनतया कारणं नये–त्वनेगु समस्याया दथुइ ब्वलंसां वय्कः थौं छम्ह उद्योगपति–व्यापारीया ल्याखं थःगु म्हसीका दयेकेत ताःलाःगु दु । वय्कः बि.के. अल्मुनियमया प्रबन्ध निर्देशक, अब्सु नेपालया निर्देशक खः । वय्कःया आल्मुनियम व स्टिल उद्योगं राष्ट्रिय वाणिज्य बैंक, रोनास्ट भवन, छायाँदेवी भवन, सुन्दरीजलया वाटर ट्रिटमेन्ट प्लान्ट, नेपाली सेनाया छाउनी, नगरकोटया अस्पताल थेंज्याःगु भवनय् ज्या यायेधुंकूगु दु ।

नेपाली सेना लिसे जक ज्या यानाच्वंगु च्यादँ दयेधुंकूगु दु । ल्याय्म्हया वैंशय् म्हितेगु, चाःहिलेगु त्वःतूसां सामाजिक सेवाय् धाःसा सक्रिय हे जुयाच्वनादीम्ह खः । थौंकन्हय् ए डिभिजन फुटबल म्हिताच्वंगु च्यासल युवा क्लबया वय्कः संस्थापक उपाध्यक्ष खः । वय्कः थ्व क्लबया अध्यक्ष नं जुयाः फुटबलया विकास व च्यासः त्वाःया विकासय् नं लगे जुयादिल ।

अध्यक्ष त्वःतेधुंकुुसां निसें वय्कः थौंतक च्यासल युवा क्लबया सल्हाकार जुया च्वनादीगु दु । अथेहे यलया परम्परागत ज्यापु त्वालय् दुथ्याःगु च्यासः त्वालय् नं वय्कः थीथी पदय् च्वनाः ज्या याना वयाच्वनादीगु दु । अथेहे थौंकन्हय् वय्कः च्यासलय् हे च्वंगु श्रमिक शान्ति माध्यमिक विद्यालयया व्यवस्थापन समितिया अध्यक्ष नं खः ।

उलि जक मखु वय्कः ल्याय्म्हया बैंशय् निसें हे नेपालभाषा ख्यलय् नं सक्रिय जुया वयाच्वनादीम्ह खः । वि.सं. २०४६ सालय् प्रजातन्त्र वये न्ह्यः हे वय्कः नांजाःपिं कलाकारत गोविन्दमान व्यञ्जनकार, इन्द्र व्यंजनकारपिं लिसे जानाः नेपालभाषाया दबूप्याखं म्हिता वयाच्वनादीम्ह खः । उबलेया खँ लुमंकुसें वय्कलं धयादी, ‘०४६ सालय् प्रजातन्त्र वयेधुंकाः जिमिसं प्रजातन्त्र वलकि छु फाइदा जुइ धकाः त्वाःत्वालय् वनाः नाटक क्यं वनेगु याना ।’

थथे प्रजातन्त्रया लबः छु दइ धकाः त्वाःत्वालय् नाटक क्यनाः ध्वाथुइकः वनाच्वनादीम्ह वय्कः थम्हं हे धाःसा प्रजातन्त्र लिपाया राजनीति खनाः दिक्क जुयाः राजनीति हे त्वःतादिल । मखुसा वय्कः प्रजातन्त्र वये न्ह्यः मोदनाथ प्रश्रित थेंज्याःपिं नेतातय्त थःगु छेँय् हे नके त्वंके यानाः सेल्टर बिया वयाच्वनादीम्ह खः ।

राजनीतिइ वितृष्णा वःसां थःगु उद्यमया लिसें समाजसेवाय् वय्कः थौं नं उतिकं सक्रिय जुया च्वनादीगु दु । वय्कलं नेवाः ल्याय्म्ह पुस्तायात नं उद्यम, व्यापार क्षेत्रय् वयेमाःगु खँय् प्रोत्साहित यानादी । वय्कःया सुझाव दु ‘स्वनिगःया किसानतय्सं जग्गा मियाः छेँ दनेगु जक ज्या यानाच्वन । अथे मखुसे बुँ हे मिउसां उकियात उद्योगधन्दाय् लगानी यायेमाः । अथेहे मेटल वक्र्सया क्षेत्रय् हे ज्या यायेगु खःसा छुं मसिइकं छक्वलं तिंन्हुया वयेगु मखुसे थुकिया प्रविधि, बजाः बारे सिइका वःसा बांलाइ ।’

सम्बन्धित बुखँ

LEAVE YOUR COMMENTS