कक्षा ११ व १२या जाँच स्थगित

येँ – राष्ट्रिय परीक्षा बोर्डं कक्षा ११ व १२या वार्षिक जाँच स्थगित याःगु दु । बोर्डं कोरोना भाइरसया संक्रमणया कारणं मेगू सुचं जारी मयातले जाँच लिछ्यायेगु निर्णय याःगु खः ।

आःया संक्रमणकालीन अवस्थाया सुधार जुयाः जनजीवन सामान्य अवस्थाय् थ्यनेवं परीक्षाया न्हूगु धलः पिथनेगु जानकारी नं परीक्षा बोर्डं बिउगु दु । बोर्डं थःगु मातहतय् दुगु फुक्कं प्रदेश परीक्षा व्यवस्थापन ज्याकू शाखा ज्याकूयात सोही बमोजिम ज्या यायेत निर्देशन बिउगु दु ।

अथेहे परीक्षा बोर्डं विद्यार्थी, अभिभावक नापं फुक्कं नागरिकयात थुगु महामारीपोखं बचे जुइत सावधानीपूर्वक च्वनेत व सामाजिक दुरी कायम यायेत इनाप याःगु दु । नापं फुक्कं विद्यार्थी वर्गयात छेँ हे च्वनाः स्वअध्ययनपाखें जाँचया तयारी यायेत नं इनाप याःगु दु ।

कक्षा १२या परीक्षा वैशाख ८ गते निसें व ११या परीक्षा वैशाख २१ गते निसें सुरु यायेगु परीक्षा बाेर्डया योजना दुगु खः ।