‘प्लस टु’लय् नं फुल टाइम शिक्षक माः’
छिगु स्कुलय् प्लस टु कक्षा गुबलय् निसें सुरु जुइ, छु छु विषय ब्वने दइ?
जिमिसं थन बालाजुया स्कुलय् थुगुसी निसें प्लस टु सुरु यायेत्यनागु दु। थन वइगु साउन १६ गते निसें कक्षा संचालन जुइ। जिमित म्यानेजमेन्ट, साइन्सया लिसें ह्युमिनिटिजया कक्षा संचालनया स्वीकृति दुसां थुगुसी म्यानेजमेन्टया कक्षा जक निं संचालन यायेत्यनागु दु।
आकिवं निसें मेगु संकायया कक्षा नं संचालनय् वइ। म्यानेजमेन्टपाखे जिमिसं होटल म्यानेजमेन्ट, ट्राभल एण्ड टुरिजम व कम्प्युटर साइन्स विषयय् ब्वंकेत्यनागु दु। थ्व बाहेक बिजनेस स्टडी, एकाउन्ट कयाः पूवंक व्यवस्थापन जक नं ब्वनेफइ।
भर्ना प्रक्रिया, शुल्क छु गुकथं दु?
११ कक्षाया निंतिं भर्ना सुरु जुइधुंकूगु दु। भर्नाया निंतिं चिकिचाधंगु इन्ट्रान्स जाँच छगू बीमाः। मेगु सामान्य प्रक्रिया हे खः। शुल्कया खँ ल्हायेगु खःसा मेमेगु स्कुलय् स्वयां जिमिसं सहुलियत ध्यबां ब्वंका च्वनागु दावी यायेफु। एसईई परीक्षाय् वःगु गे्रडया आधारय् छात्रवृत्तिया सुविधा बियातयागु दु।
पूवंक भौतिक पूर्वाधार, अतिरिक्त क्रियाकलाप याका वयाच्वनागु जिमिगु स्कुलय् एसईई परीक्षाय् ए प्लस ग्रेड वःम्हेसिनं ३०–४० हजार तका दामं याउँक ११ कक्षा ब्वनेफइ। थ्व हे ल्याखं थ्वयां म्हो ग्रेड वःपिंसं भचा भचा जक अप्वः ध्यबा पूसां गाइ। थन बियातयागु छात्रवृत्ति नं ११ कक्षायात जक मखु १२ कक्षाय् नं व हे कथं लागू जुइ।
भौतिक पूर्वाधार बांलाः ला धयादिल, भौतिक पूर्वाधारं जक स्कुल बांलाःगु जुइ ला?
भौतिक पूर्वाधार धकाः जिमिसं स्कुल भवनया जक खँ ल्हाना वयाच्वनागु मखु। स्कुल दुने छ्यला वयाच्वनागु प्रविधिया नं खँ ल्हानाच्वनागु दु। जिमिगु लक्ष्य धयागु हे थौंया मस्तय्त ‘ग्लोबल सिटिजन’ दयेकेगु खः। संसारया न्ह्यागु थासय् वंसां झी मस्त सक्षम जुइमा धयागु जिमिगु आज्जु खः।
ग्लोबल सिटिजन दयेकेगु धायेगु, अले पुलांगु हे धर्रां ब्वंका च्वनां ला मजिल। उकिया निंतिं जिमिसं थन थौं २१ औं सदीयात ल्वः कथं प्रविधी मैत्री स्कुल दयेकातयागु दु। ब्वंकेगु इलय् स्मार्ट बोर्ड तयाः ब्वंकेगु व्यवस्था यानाच्वनागु दु। थ्व स्मार्ट बोर्डय् शिक्षकं च्वयाबिउगु खँ कम्प्यूटरया हार्डड्राइभय् सेभ जूवनी।
थुकिया जिमिसं वेबसाइटय् तयाबीगु जुइ। लिपा विद्यार्थीतय्त माल धाःसा थःत माःगु इलय् ल्ह्यया कायेफइ। अथेहे कम्प्यूटर ल्याब, पुस्तकालयया उत्कृष्ट सुविधा बियाच्वनागु दु। मस्तय्त निगरानीया निंतिं कक्षाक्वथापतिकं सिसि क्यामेरा जडान यानाः मोनिटरिङ यानाच्वनागु दु। कक्षाक्वथा वातानुकूल दयेकातयागु दु।
थौंकन्हय्या मस्तय्त ब्वँ जक ब्वंकां मजिउ। अतिरिक्त क्रियाकलाप नं उलि हे याकेमाः। थुकिया निंतिं जिमिसं राष्ट्रिय बास्केट बल प्रशिक्षक विकास शाहीया नेतृत्वय् अतिरिक्त क्रियाकलापया निंतिं छगू टिम हे दयेकातयागु दु। स्वीमिङ, फुटबल, बास्केटबल थेंज्याःगु कासाख्यःया लिसें संगीत, नृत्यपाखे नं मस्तय्त थीथी क्रियाकलाप याकेगु जुइ।
मस्तय्त दयेकीगु धयागु शिक्षकपिंसं हे खः, थ्व खँय् जिमिसं छुं सम्झौता यानागु मदु। नरेशप्रसाद श्रेष्ठ, सिइओ, समृद्धि स्कुल
प्लस टु ला थुगुसी तिनि संचालन जुइत्यंगु दु, थज्याःगु अवस्थाय् अभिभावकपिंसं छिकपिंत विश्वास यायेमाःगु कारण छु दु?
दकलय् न्हापां ला थ्व स्कुल छम्ह निम्हेसियागु सोचं चायेकागु मखु, सामूहिक सोचं चायेकागु खः। स्कुलया अध्यक्ष मनोहर भट्टराईजु थः हे छम्ह आइटी विज्ञ खः, अले वय्कः नेपाल सरकारया उच्चस्तरीय सूचना प्रविधि आयोगया उपाध्यक्ष जुयादीधुंकूम्ह खः। जि थः हे शिक्षण क्षेत्रय् ३० दँया अनुभव ज्वना वयाच्वनाम्ह खः।
रविभवनया लिंकन स्कुलय् ब्वंकेगु सुरु यानाम्ह जिं शंकरदेव कलेजय् ब्वंके धुनागु दु। प्राइम कलेजया संस्थापक जुयाः झिंन्हय्दँ तक कलेज संचालन यानागु अनुभव दु। अथे हे स्कुलया मेपिं संचालकपिं थःथःगु ख्यलय् नांजाःपिं विज्ञपिं दु। जिमिगु अनुभव, जिमिगु मंकाः सोचं हे मस्तय्त गुणस्तरीय शिक्षा बीगु जुइ, थुकी अभिभावकपिंसं जिमित पूवंक विश्वास यायेफइ।
गुणस्तरीय शिक्षाया निंतिं संचालकपिं जक अनुभवी जुयां ला मजिल नि।
मुख्य खँ ला थ्व हे खः कि मस्तय्त ब्वंकीपिं, प्रत्यक्ष सम्बन्ध तयाच्वनीपिं शिक्षकत गज्याःपिं जुइ। गुणस्तरीय शिक्षाया निंतिं शिक्षकत गुणस्तरीय जुइमाल, अले जक मेमेगु पूर्वाधारया खँ वइ। शिक्षक व विद्यार्थी दथुइ बांलाःगु सम्बन्ध दयाच्वनेमाः , मस्तय्त छुं समस्या जुइबलय् समाधानया निंतिं शिक्षक न्ह्यःने दयेमाः धयागु खँय् जिमिसं पूवंक ध्यान तयागु दु।
दकलय् न्हापां जिमिगु धापु छु दु धाःसा प्लस टु शिक्षा धयागु नं स्कुल शिक्षा खः। उकिं थन नं स्कुलय् थें फुलटाइम शिक्षक दयेमाः। थःगु विषयया कक्षा कयाः मेथाय् वनीपिं पार्टटाइम शिक्षकं प्लस टु संचालन यायेमजिउ। थ्वहे खँयात मनन यासें जिमिसं फुलटाइम शिक्षकया व्यवस्था यानागु दु। उपिं न्ह्याबलें विद्यार्थीतय् लिसे हे दइ।
थथे जुल धाःसा विद्यार्थी व शिक्षक दथुइ स्वापू बांलाइ, बल्लाइ, अले विद्यार्थीं छुं समस्या जुल धाःसा शिक्षकया ग्वाहालि कायेफइ।अथेहे थन थुगुसी निसें जक कक्षा संचालन जुइत्यंसां शिक्षकत अनुभवी व तालिमप्राप्त हे तयातयागु दु। मस्तय्त दयेकीगु धयागु शिक्षकपिंसं हे खः, थ्व खँय् जिमिसं छुं सम्झौता यानागु मदु।
LEAVE YOUR COMMENTS