ने. सं. ११४४ कौलाथ्व एकादशी - चालं

चीधंगु पत्रिकातय्त तःधंगु मार !

येँ (नेपालभाषा टाइम्स)- छापा पत्रिकातय्त सरकारं बीगु याना वयाच्वंगु लोक कल्याणकारी विज्ञापन थ्वहे जेठ महिनांनिसें बन्द याइगु जूगु दु । विज्ञापन बोर्डं म्हीग छगू सुचं पित बिसें छापा पत्रिकातय्त उमिगु वर्गीकरण कथं विज्ञापन वापत पुलेमाःगु ध्यबा सरकारं छ्वया महःगु कारणं यानाः जेठ १५ गते लिपा विज्ञापन बी मफइगु जानकारी बिउगु खः ।

लोककल्याणकारी विज्ञापन मबीगु बोर्डया थ्व निर्णययात पत्रकारतय्सं धाःसा विरोध याःगु दु । नेपाल पत्रकार महासंघ, नेवाः राष्ट्रिय पत्रकार दबू आदि संस्थातय्सं म्हिगः विज्ञापन बोर्डया ज्याकुथिइ धर्ना बिसें विज्ञापन बन्द यायेगु निर्णयया विरोध याःगु खः । विज्ञापन मबीगु निर्णय लित कायेमाः धकाः उमिसं जोडदार माग याःगु खः ।

थ्वहे झ्वलय् नेपाल पत्रकार महासंघया महासचिव रोसन पुरीं नं म्हिगः हे छगू वक्तव्य पित बिसें विज्ञापन बोर्डया थ्व निर्णयं कोरोना लिपा थाकुयाच्वंगु छापा पत्रकारिताया अवस्थायात झन् हे थाकुका बी धासें विज्ञापन बन्द यायेगु निर्णय लित कायेत इनाप याःगु दु । बोर्डया थ्व निर्णयं चीधंगु लगानी व स्वरोजगारमूलक छापा माध्यमतय्त संकटय् लाका बीगु जूगुलिं विज्ञापन निरन्तर जुइमाःगु माग नं याःगु दु ।

अथेहे नेवाः पत्रकार राष्ट्रिय दबुलिं नं छगू वक्तव्य पितबिसें लोककल्याणकारी विज्ञापन बीगुलिइ ई कथं परिमार्जन यायेमाःगुलिइ अःखतं सञ्चारकर्मीतय् अहित जुइकथं विज्ञापन बोर्डं निर्णय याःगु धासें थुकी थःपिनि ध्यानाकर्षण जूगु खँ धाःगु दु । कोरोना महामारीया कारणं अथें नं समस्याय् लानाच्वंगु अवस्थाय् विज्ञापन बोर्डं ध्यबा निर्णय याःगु कारणं चिचीधंगु लगानीइ चायेकातःगु स्वराजगारमूल छापा सञ्चार थप धरासायी जुइगु खँ दबुलिं धाःगु दु । दबुलिं विज्ञापन बोर्डया निर्णय तुरुन्त लित कयाः लोककल्याणकारी विज्ञापनयात निरन्तरता बीत ध्यानाकर्षण याना धाःगु दु ।