चुनावया तयारी
वंगु कांगे्रसया महाधिवेशनया इलय् । छपा किपा खनी । सभापति पदय् दंम्ह प्रधानमन्त्री शेरबहादुर देउवाया ल्हाःती प्लेट व चम्चा । कार्यकर्तातय् झ्वलय् । नयेत । तस्वीरया प्रस्तुतिया आशय जुइ । ‘स्वयादिसँ ! प्रधानमन्त्री देउवा गुलि सरल, साधारण जनतालिसे घुलमिल यायेगु क्षमता दुम्ह । भ्याः भचा हे बडकपन मदुम्ह ….. ।’ किपाया प्रस्तुतिं कार्यकर्तातय् नुगलय् चुनावी छाप त्वःतेगु टिकडम खनेदइ । किपा स्वयाच्वनाम्ह जितः । प्रधानमन्त्रीजुया छगू निगू अन्तर्वार्ता, अन्तरक्रिया लुमनी । साधारण प्रश्नकर्तालिसे शेरबहादुरजुया असभ्य, असहिष्णु व्यवहार लुमनी । गय् यानाः जननेता धायेगु ? न्ह्यसः ठि· दं वइ । मती लिसः लुइ । किपा नेताया चुनावी सरलता जक खः । छद्म सरलता !
देशय् आः स्थानीय तहया चुनाव वयेत्यंगु दु । अले प्रदेश व राष्ट्रियस्तरया आम चुनाव नं वइ । देय् जनताया हित, कल्याणया निंतिं छुं योजना जुक्तिप्रति गम्भिर मजूसां देय्या नेतात चुनावय् गथे यानाः जाल, झेलया योजना जुक्तिया ग्वसाः ग्वयेगु धइगु खँय् तसकं हे माहिर ! क्षमतावान । उकिं उकिं दूरदर्शी नेतातय्सं वइगु चुनावयात ध्यानय् तयाः जनतायात ध्वं लानाः गथे यानाः भोट मुनेगु, जालझेलया रिहर्सल न्ह्याकेधुंकूगु दु । थौंकन्हय् विभिन्न दलया शीर्षस्थ नेतातसें थःगु भाषण, आचरणय् चुनावी हर्कतत छ्यला हयेधुंकूगु दु । चुनावी नाटक मञ्चन यायेगु अभिनय, संवाद न्ह्याकेधुंकूगु दु ।
संसदीय व्यवस्थाय् जनतां जनप्रतिनिधित चयन याइ । सरकार जनप्रतिनिधिपाखें दयेकी, संचालित याइ । देय्या संचालन जनप्रतिनिधितपाखें जुइगुलिं हरेक दलत थःगु बहुमतया लागि चुनावया इलय् जनताय् वनी । जन समर्थन कायेत स्वइ । तर चुनावया इलय् जनमत थःगु पक्षय् कायेगु निंम्तिं नेतातय्सं अनेक तिकडम म्हिती । भ्रमजाल छ्यलाः जनमतयात भुलभुलैयाय् लाकी । खःगु मखुगुं खँ ल्हानाः जनताया निर्णय, क्षमतायात गलत लँय् यंका बी । दां लः थें ह्वली । जनताया सोच विचाःयात विकृत यानाः बी ।
दलतय्सं थःथःगु स्वार्थया निंतिं अनेक दाउपेच छ्यलीगुलिं चुनावय् त्याका वइपिं अधिकांश जनप्रतिनिधित विशुद्ध जनप्रतिनिधि खने दइमखु । चुनावया इलय् ल्हाः ज्वज्वलपा यानाः थःत जनताया सेवक धकाः अभिनय याना जुइपिं नेतातय्सं लिपा शक्तिइ थ्यंकाः थःत मालिक खंकी । मालामाल जुइगु लँय् वनी ।
हालय् कमरेड प्रचण्डं थः झुपडीइ च्वं वनेगु इच्छा जोहर याइ । शानदार छेँय् च्वनाः विलासी जीवन हनाच्वन धकाः विपक्षीतय्सं याये फुगु चुनावी आलोचनायात ध्यानय् तयाः कमरेड प्रचण्डं झुपडीइ च्वं वनेगु चुनावी इच्छा प्वंकूगु खःला ? अनुमान याइपिं दु । छगू इलय् ‘जिलिसे शान क्यानीपिंत जिं अ·लय् न्याका बी, जिं अनेक नेतातय्त प्रधानमन्त्री दयेका बियागु दु।’ थथे शान क्यनीम्ह कमरेड प्रचण्डं इलय् ब्यलय् थौंकन्हय् जिगु नं कमजोरी दखु धकाः स्वीकारोक्ति प्वंका हयाच्वंगु दु । शायद थ्व नं चुनावी तयारी खः ला ?
एमाले त्वःताः माधव नेपाल लिना वंम्ह रामकुमारी झाँक्री छम्ह शानदार व्यक्तित्व खः । वय्कःया भाषण तसकं ओजपूर्ण जू । हालय् थःगु जिल्लाय् छगू भाषणय् रामकुमारी झाँक्रीं ख्वबि हायेकाच्वंगु किपा खन । मत्ती वल । झाँक्रीया ख्वबि झसुकाः नं चुनावी तयारीया खेल खः ला ? माधव नेपालं एमालेया नां हे कायेमते । व झौ जुइधुंकल धाइ । माधव नेपालया जव ल्हाः रामकुमारी झाँक्रीं थःगु हे गृह जिल्लाय् च्वंगु एमालेया छेँ खनाः संवेदनशील जुइ । ख्वइ । शायद थ्व संवेदनशीलता नं चुनावी हर्कत खः ला ?
एमालेया शिखर पुरुष केपी ओली थौंकन्हय् आलीबाः जूगु दु । कार्यकर्तातय् थःथः अबु दइ । छाय् नेतातय्त ‘बाः’ धाःगु जुइ । प्रश्न याइपिं दु । बरु ‘बाः’ धायेगु पलेसा ‘ब्वाजु’ धाःसा जिउ नि । सुझाव बीपिं नं दइ । न्यने दु, माओवादीं नं कमरेड प्रचण्डयात ‘बाः’ धायेगु अभियान न्ह्याकेत्यंगु दु । अले माधव नेपाल जक छाय् सुम्क च्वनी । माधव नं थःगथु दलया सर्वोच्च नेत खः । ओली स्वयां छुकिया कम ।
कार्यकर्तातय्सं माधव नेपाल बाः मधासे ‘बाजे’ हे धया हइगु जकं खः ला ? चुनावया थ्व नं आकर्षण हे जुइ । हाकनं सु स्वयां सु कम धइगु प्रतिस्पर्धाय् केपी ओली, कमरेड प्रचण्डयात नं थःथःगु दलं ‘बाजे’ धकाः सम्मानित व संबोधित याना हइगु खः ला ? छु बेर !
खतुं स्वम्हं नेतातय् ‘बाजे’ पद कुलिन अधिकारया खँ नं खः । ‘बाजे’ खँग्वलं नेतातय्त सम्मानित व संबोधन यायेबलय् भचा जातीय गन्ध पिज्वयाः चुनावय् प्रतिकूल प्रभाव लाः वनीला धकाः विश्लेषण याइपिं नं दु ।
छखेर एमालेया नेता केपी ओली आः वइगु दक्व चुनावय् थः सर्वश्रेष्ठ जुइ । धकाः चुनावी मस्तीइ लीन जुयाच्वंगु दु । मेखेर माधव नेपालं एमालेया आः वइगु चुनावय् पत्ता साफ जुइ चुनावी शंखनाद थ्वयेकाच्वंगु दु । छगू दलया कार्यकर्तात मेगु दलय् पय्नं वनेगु क्रिया तीव्र गतिं जुयाच्वंगु दु । देशय् थौं राजनीति धइगु हे चुनाव, चुनावी धइगु हे राजनीति जुयाच्वंगु दु ।
LEAVE YOUR COMMENTS