प्यानयात कयाः महासंघ आन्दोलनय् वनीगु
येँ – सरकारं चालु आर्थिक दँ निसें लागू याःगु प्यानया प्रावधानयात कयाः नेपाल उद्योग वाणिज्य महासंघं देय्न्यंकं हडताल याइगु जूगु दु । बुधवाः च्वंगु महासंघया कार्यसमितिया बैठकं यदि सरकारं थःपिनि मागयात माने मयात धाःसा देय्न्यंकं हडताल यायेगु बारे सहलह जूगु खः । महासंघं प्यान लागू यायेगु निंतिं म्होतिं नं झिद्वः तकाया सिलिङ्ग जुइमाःगु माग यानाच्वंगु दु ।
सरकारं धाःसा द्वःछि दां खर्च यायेबलय् हे प्यान माःगु व्यवस्था यानातःगु दु । सरकारं हःगु कर सम्बन्धी न्हूगु नियमय् द्वःछिं खर्च यायेबलय् प्यान नं. उल्लेख मयात धाःसा उकियात खर्चय् जने यायेदइमखु धकाः धयातःगु दु ।महासंघया कार्यसमितिया अधिकांश दुजःतय्सं बैठकय् सरकारं व्यावहारिक पक्षयात बेवास्ता यानाः एकपक्षीय रुपं थःगु अडान कायम यानाच्वन धाःसा हडतालय् वनेगु बाहेक मेग विकल्प मदु धयागु खँ तःगु खः ।
महासंघं पारिश्रमिकय् अनिवार्य प्यान लागू यायेबलय् झिद्वः तका स्वयां च्वय् जुल धाःसा जक लागू यायेमाःगु, उद्योग व भन्सार पपरिसरं पिहां वइगु मालवस्तुइ जक भिसिटीएस लागू यायेमाःगु खरिद बिलय् नं झिद्वः स्वयां च्वय् जक प्यान बिल अनिवार्य यायेमाःगु अडान तया वयाच्वंगु दु ।
सरकारं प्यानया लिसें भेहिकल एण्ड कन्साइनेमेन्ट ट्र्याकिङ सिस्टम (भिसिटीएस) लागू यायेधुंकाः थुकिया कार्यान्वयनय् वइगु जटिलताया बारे अध्ययन यायेत सरकारी प्रतिनिधि व निजी ख्यःया प्रतिनिधि तयाः छगू कार्यदल गठन यानातःगु दु । थ्व कार्यदलय् निगुलिं पक्षं थःथःपिनि अडान मत्वःतूगुलिं कार्यदलं प्रतिवेदन तकं तयार यायेमफयाच्वंगु खँ धाःगु दु ।
LEAVE YOUR COMMENTS