थुगुसी सिनाज्या १५ प्रतिशत म्हो
राष्ट्रिय अर्थतन्त्र तकं प्रभावित जुइगु सम्भावना
येँ – वा पीमाःगु इलय् हे तराई लागाय् वःगु खुसिबाः व अप्वः वर्षां यानाः थुगुसी नेपालय् वा पीगु ज्या कम जूगु दु । थुकिया लिच्वः कथं थुगुसी वा उत्पादन समेत कम जूवनीगु खँ धाःगु दु ।थुगुसी देय्न्यंकं करिब ८५ प्रतिशत ति जक वा सिनाज्या जूगु दु । थुकिं यानाः थ्व दँय् करिब १० प्रतिशत वा उत्पादन म्हो जुइ फइगु अनुमान सरकारं याःगु दु ।
नेपाःया कुल गार्हस्थ उत्पादनय् वा छगूया जक योगदान ७ प्रतिशत दु । यदि वा उत्पादन कम जुल धाःसा देय्या कुल गार्हस्थ उत्पादन तकं प्रभावित जुइ फइगु खँ नं विज्ञतय्सं धाःगु दु । यदि आः अनुमान याः कथं वाया उत्पादन १० प्रतिशतं कम जुल धाःसा नेपाःया कुल विकास तकं शुन्य दशमलव ५ प्रतिशतं कम जुइ फइगु खँ नं धाःगु दु ।
थथे जुल धाःसा थुकिं नेपाःया समग्र अर्थतन्त्रयात हे प्रभावित याय फइगु खँ नं धाःगु दु । नेपाः सरकारं थुगुसी नेपाःया विकास ८.५ प्रतिशत हासिल यायेगु लक्ष्य तयातःगु दु । तर वा उत्पादन १० प्रतिशतं घटे जुल धाःसा थ्व लक्ष्य हासिल यायेत थाकुइगु खँ धाःगु दु । वंगु दँय् नेपालय् कुल ५६ लाख मेट्रिक टन वा उत्पादन जूगु खः ।
थ्व धइगु व स्वयां न्ह्यःया वर्षया उत्पादन स्वयां ५ लाख मेट्रिक टन अप्वः खः । देशय् केपी ओलीया सरकार वयेवं हे वाया उत्पादन अप्वःगुलिं प्रम ओलीं उकी गर्व समेत यानादीगु खः । वय्कलं थाय्थासय् भाषण यायेगु झ्वलय् कृषि प्रधान देशय् वा उत्पादन अप्वःगुलिं आः विकासया लक्ष्य हासिल यायेत अःपुइगु जुल धायेगु यानादीगु खः ।
तर थ्व दँय् धाःसा वय्कलं अज्याःगु दावी याये फइगु अवस्था मदुगु खँ विज्ञतय्सं धाःगु दु ।थुगुसी वा पीगु इलय् लाक्क हे तराईया आपालं थासय् खुसिबाः वयाः वा पी मखंगु खः । लिसें डुबानं यानाः गुलिखे थासय् पिना तयेधुंकूगु वा तकं नष्ट जूगु खः । थुकिं यानाः राष्ट्रिय अर्थतन्त्रय् लिच्वः लाइगु ला द हे दु, उकिया नापनापं अपालं किसानतय् न्हियान्हिथंया जीवनय् तकं संकट वये फइगु खँ नं धयाहःगु दु ।
LEAVE YOUR COMMENTS