नवदुर्गा द्यःयात खःम्येय् देछा

ख्वप – जेँला त्वालय् च्वंम्ह कृष्णमाया गाईजुं थुगुसी मोहनिया निंतिं नवदुर्गा द्यः गणयात माःगु पुजाविधि पूवंकेगु लागिं खःम्येय् देछाःगु दु । मय्जु गाईजु थथे खःम्येय् देछाःम्ह न्हापांम्ह मिसा नं जुयादी दु । आः तक थथे मिस्तय्सं खःम्येय् दान याःगु रेकर्ड हे मदुनि । शुक्रवाः न्हिनय् ११.४५ बजेया साइत लाकाः वय्कलं द्यःछेँय् यंकाः उम्ह खःम्येय् द्यःयात देछानादीगु खः ।

नकिंपाखें नित्यकर्म यानाःलि विधिवत रुपं उम्ह म्येय्यात पुजा नं याःगु खः । वयां लिपा वयात द्यःछेँय् च्वंगु गोठय् यंकाः चिना बिउगु खः । थथे दान बिउकुन्हुनिसें हे उम्ह दान बिउम्ह मनुखं तुं खःम्येय्या पालन पोषण व रेखदेख यायेमाःगु प्रावधान कथं वयात खरखजाना खर्च नं बिउगु दु ।

वय्कः कृष्णमाया गाईजुया काय्पिं न्हुछेराम गाईजु, कृष्णहरि गाईजु व कृष्णश्याम गाइजुं नवदुर्गा द्यःयाथाय् विधिवत पुजाआजा व प्रसाद ग्रहण नं यानादीगु खः । सुडालं ग्वीद्वः दां पुलाः न्यानाहःम्ह उम्ह खःम्येय् आः स्वला तक उगु हे द्यःछेँय् लहिना तइ । दान लिपा प्यदँ न्ह्यः हे उकथं द्यःयात खःम्येय् दान यायेगु थःगु मनसुवा पूवंगु खँ कृष्णमाया गाईजुं कनादिल ।

आः मेगु प्यदँ तक नं द्यःयात खःम्येय् दान याइपिं क्वःछिना तयेधुंकूगु दु । द्यःयात खःम्येय् दान याये न्ह्याःपिंसं तःदँ न्ह्यः हे थःगु नां च्वका तयेमाः ।

देवगणया दुजः धन बनमालां नेपालभाषा टाइम्सलिसे खँ ल्हासें थथे दातापाखें दान बीम्ह खःम्येय् ल्ययेगु इलय् छुं नं कथंया घाः मजूम्ह व झिंनिगू चक्र दुम्ह, न्हाय्पं प्वाः खना मतःम्ह, वा महाःम्ह म्येय् जुइमाः । न्हापा न्हापा थथे द्यःयात खःम्येय् छाइपिं मदुगु इलय् नवदुर्गा गणया नायःपाखें हयाः खःम्येय् छायेगु याना वयाच्वंगु खः ।