न्हूगु विश्वसम्पदा

संयुक्त राष्ट्र संघ अन्तर्गतया युनेस्को विश्वया सम्पदा संरक्षणय् ज्या याना वयाच्वंगु संस्था खः । थ्व संस्थां विश्वन्यंकं थीथी सम्पदाया धलः दयेकाः उगु सम्पदाया संरक्षणया ज्या याना वयाच्वंगु दु । युनेस्कों नेपाःया स्वयम्भू, पशुपतिनाथ, हनुमानध्वाखा लाय्कू निसें थीथी निकुञ्ज, पुलांगु बस्तीयात नं सम्पदा धलखय् दुथ्याकाःगु दु । थ्व संस्थां दँय्दसं न्हून्हूगु सम्पदायात विश्व सम्पदा धलखय् दुथ्याकेगु याइ । थ्व झ्वलय् थुगुसी नं थीथी देय्या न्हय्गू थाय्यात विश्व सम्पदा धलखय् दुथ्याकूगु दु ।

भारतया जयपुर शहर
भारतया ‘गुलाबी शहर’ नामं लोकंह्वाःगु राजस्थानया जयपुरयात थुगुसी विश्व सम्पदा धलखय् दुथ्याकूगु दु । जयपुरया गुलिखे छेँय् स्वसः दँ स्वयां पुलांगु दु । थुपिं छेँ आःतक नं पुलांगु हे ढंगं बांलाक छाय्पियातःगु दु । पर्यटकतय् निंतिं थ्व थाय् आकर्षणया केन्द्र जुयाच्वंगु दु ।

आइसल्यान्डया वातानायकुल राष्ट्रिय पार्क
थ्व पार्क ज्वालामुखीय क्षेत्र आइस्लयान्डया १४ प्रतिशत ब्वय् न्यना वनाच्वंगु दु । थ्व पार्कय् यक्व हे ग्लेसियर दु । थुकिया लिसें थन यक्वया बांलाःपिं प्राकृतिक जीव, लाभा फिल्डस व अजूचायापुपिं जीवजन्तुत खंकेफइ ।

 

फ्रान्सया ओस्ट्रल ल्यान्डस एण्ड सीज
थ्व थाय् दक्षिणीय समुद्रया दथुइ लाक लाः । थनया चिचिधंगु द्वीपयात युनेस्कों विश्व सम्पदा धलखय् दुथ्याकूगु खः । थन संसारया हे दकलय् अप्वः पंक्षी व जलजीव च्वनी । थुपिं मध्ये किंग पेंग्विन नं दुथ्याः ।

जापानया प्राचीन माउन्डेड टम्ब्स
जापानया ओसाका प्रान्तय् ४९ गू समाधीस्थल दु । थ्व समाधीस्थलत स्वंगूगु निसें खुगूगु सदीया खः । थन थीथी आकारया पर्वत नं दु । थ्व पर्वतय् ताःचा दुछ्वयेगु थेंज्याःगु ह्वः थें खनेदुगु छगू तःधंगु पर्वत नं दु । थ्व पर्वत नां सम्राट निनटोकूया नामं तयातःगु दु । थ्व जापानया दकलय् तःधंगु समाधीस्थल खः ।

इराकया बेबिलोन
तःदँया कुतः लिपा इराकया प्राचीन शहर बेबिलोनयात युनेस्कों विश्व सम्पदा धलखय् दुथ्याकूगु दु । इराकय् जुयाच्वंगु राजनीतिक उथलपुथलया कारणं थ्व थासय् च्वंगु यक्व सम्पदाय् क्षति जुइधुंकूगु दु । हालासालय् थन ल्ह्वनेगु ज्या जूगु दु ।

म्यानमारया बगान
म्यानमारया प्राचीन राजधानी जुयाच्वंगु थ्व थाय् पर्यटकतय् आकर्षकया केन्द्र जुयाच्वंगु दु । थन द्वलंद्वः बुद्धया देगः दु । भचा तापाकं स्वयेबलय् द्वलंद्वः चैत्य खनेदइगु थ्व थाय् तसकं हे आकर्षक खनेदु ।

 

लाओया प्लेन अफ जार
लोओसया दथुइ तःग्वःगु ल्ह्वतं दयेकातःगु हजारौं क्वँचा खनेदइ । पुरातत्वविद्तय् कथं थ्व रहस्यमयी ल्ह्वतं दयेकातःगु क्वँचा ढुंगेयुगया खः । विज्ञतय् धापू कथं ल्वहं युगय् थ्व क्वँचा अन्तिम संस्कारया इलय् छ्यलीगु खः ।

 

सम्बन्धित बुखँ

LEAVE YOUR COMMENTS