ने. सं. ११४३ चौलाथ्व सप्तमी -

सँ हाया मवंकेगु घरेलु उपाय

थायराइड ल्वय्, ल्यूपस, डायबिटिज, एनिमिया व इटिंग डिसअर्डर सँ हाइगु कारण जुइफु । थज्याःबलय् सँ हाइगु छु याःसा कम जुइ व थुकिया घरेलु उपाय छु दु, व बारे बिचाः यायेगु जरुरी जुइ । उकिया निंतिं थन छुं छुं उपाय बियागु दु –

कस्ति व ओलिभ आयल : छगः कचौराय् कस्ति निगू चम्चा व ओलिभ आयल निगू चम्चा ल्वाकछ्यानादिसँ । थुकी दालचिनि चुं नं तयाः चुल्लुक पेस्ट दयेकादिसँ । थुगु मिश्रण नियमित रूपं तिलेगु यानाच्वन धाःसा छिगु सँ नं बांलाइ, उकिया विकास नं जुइ ।

लेवेंडर स्वांया चिकं : बैजनी रंगयागु नस्वाःगु स्वां लेवेंडरपाखें पिकाइगु लेवेंडर चिकं सलंसः दँ न्ह्यवंनिसें अरोमाथेरापीइ छ्यला वयाच्वंगु दु । एन्टिअक्सिडेन्ट जुइगुया लिसेलिसें लेवेंडरय् एन्टिसेप्टिक व एन्टिफंगल गुण नं दइ, गुकिं सँ हाइगु व तुँचा दाइगु नितां पनाबी ।

नीहः : सँ हाइगु पनेत नीहलं नं यक्व हे योगदान यायेफु । नीहः लखय् दायेकादिसँ, अनंलि नचुक निनाः पेस्ट दयेकादिसँ । थःगु सँ स्याम्पु याये धुंकाः थ्व सँया हाय् हाय् थ्यंक पानादिसँ । ३० मिनेट लिपा लखं चाया छ्वयादिसँ । छवाःया निक्वः थथे यानादिसँ ।

प्याज : उच्च सल्फर सामग्रीया कारणं प्याजया रसं सँ हाइगु पनेत ग्वाहालि याइ, अले सँया प्वालय् प्वालय् हिया संचालन अप्वयेकी । लिसें हेयर फोलिकनयात पुनर्जीवित यानाः मनावःगु कम याइ । प्याजया रसय् एन्टिब्याक्टेरियल गुण दइगुलिं यानाः उगु रोगाणुयात स्यायेत ग्वाहालि जुइ, गुगु स्कैल्प इन्फेक्सनया कारणं जुइ, गुगु सँ हाइगु कारण जुइ । छगू अध्ययनं सीदु कथं सँय् नियमित रूपं प्याजयागु रस छ्यलाः अले मेमेगु पोषकतत्व नं कयाच्वन धाःसा सँलिसे स्वापू दुगु यक्व हे समस्या ज्यनावनी ।

कुनू : कुनू छिगु स्वास्थ्यया निंतिं गुलि बांलाः, छिगु छ्यंगू व सँया निंतिं नं उलि हे बांलाः । छवाःया निक्वः कुनू पानाबिल धाःसा छिगु सँयात यक्व हे फाइदा याइ । थुकिया निंतिं कुनूया हः चानादिसँ, अले लाः दुगु भागं छ्यनय् बुलादिसँ । छुं ई अथें त्वःता तयादिसँ, अनंलि क्वाःलखं चायाछ्वयादिसँ ।

धौ व कागति : सँ हाःगु पनेगु छगू उपाय कागति व धौ नं खः । धौ व कागतिं छताजि प्राकृतिक कन्डिस्नरया रूपय् ज्या याइ । अले सँ हाइगुयात पनाबीत ग्वाहालि याइ । धलिइ बागः कागति तिसिनादिसँ, अले थुकियात थःगु सँय् पानादिसँ । ३० मिनेट अथें त्वःता तयादिसँ । अनंलि स्याम्पुं म्वःल्हुयादिसँ । पक्का नं फाइदा जुइ ।

अम्बः : आइरन, जिंक, क्यारोटिन,फाइबर व भिटामिन प्रशस्त दुगु अम्बलं छिगु सँय् चमत्कार यायेफु । खास यानाः यदि छितः सँ हायाः समस्या जुयाच्वंगु दुसा अम्बःसुकू नैंक्याः चिकनय् तयादिसँ, अले हाकुसे च्वना मवःतले चिकं क्वाकादिसँ । क्वथाया तापक्रमय् थ्व मिश्रणयात ख्वाउँकादिसँ, अले छ्यनय् तिलादिसँ ।

समाः नेवाः