
येँ – स्वनिगलय् निषेधाज्ञा छ्वासुकूगु न्हापांगु न्हि कुन्हु छन्हुं हे ५७२ म्ह कोरोना भाइरस संक्रमितत लूगु दु । स्वनिगलय् लूपिं मध्ये ४९५ म्ह येँयापिं खःसा यलया ४३ म्ह व ख्वपया ३४ म्ह खः । स्वनिगलय् छन्हु हे संक्रमितत लूगु ल्याः थ्व आःतकया दकलय् अप्वः खः ।
अथेहे स्वनिगलय् जक म्हिगः २४ घन्टाया दुने स्वम्हेसिया कोरोना भाइरसाय कारणं ज्यान वंगु दु । सीपिं मध्ये छम्ह ५५ दँया मिसा खःसा निम्ह ५९ दँ व ८३ दँया मिजं खः । म्हिगः जक मुक्कं न्याम्हेसिया ज्यान वंगु खः । थुपिं मध्ये छम्ह चितवनयाम्ह व छम्ह कपिलवस्तुयाम्ह खः ।
थ्वहे दथुइ नेपालय् कोरोना संक्रमिततय् ल्याः नं न्यय्द्वः पार याःगु दु । म्हिगः २४ घन्टाया दुने देय्न्यंकं १२४६ म्ह थप कोरोना संक्रमितत लूगु खः । थुकिया लिसें नेपालय् संक्रमिततय् ल्याः ५० हजार ४६५ म्ह थ्यंगु दु । अथेहे आःतक देय्न्यंकं ३१७ म्ह कोरोना संक्रमणया कारणं सीधुंकूगु खँ स्वास्थ्य मन्त्रालयया प्रवक्ता डा. जागेश्वर गौतमं धयादीगु दु ।
LEAVE YOUR COMMENTS