परास्त यायेमाः
थौंकन्हय् । आम जनधारणा खनेदइ । देशय् सिद्धान्तहीन, अवसरवादी, राजनीतिया जगजगी । जनतां थौं सही राजनीतिया अनुभूति याये फयाच्वंगु मदु । राजनीतिक नेतातय्के न्यूनतम राजनीतिक संस्कार खने मदु । देय् थौं अराजनीतिं ग्रस्त । पीडित । देय् गन राजनीति सुथां लाइमखु अन जनतां दुःख सी । जनतां अन थःत हाःनाः मदुपिं खंकेमाली । थुकिया दृष्टिान्त थौं नेपाःया जनता खः धायेबलय् अत्युक्ति जुइमखु ।
डा. प्रकाशशरण महत । कांगे्रसया छम्ह प्रभावशाली नेता । अन्तर्वार्ता छगुलिइ डा. महतं धाइ सत्तारुढ गठबन्धनया बनौटयात सिद्धान्तहीन गठबन्धन धकाः कुंखिने फु । कुं खिनीपिं नं दु । तर गठबन्धनं अज्याःगु आलोचनायात मतलब तइमखु । कारण सत्तारुढ गठबन्धनया निर्माण सैद्धान्तिक समानता, निकटताया आधारय् जूगु मखु । ख हे मखु । गठबन्धनया गठनया आधार गणित खः । शक्तिइ थ्यंकेत माःगु गणित चूलाकेत । कायम यायेगु ध्येय खः । जुइ ।
थ्व हे ध्येय, उद्देश्यं गठबन्धनं निरन्तरता काइ । डा. महतया थ्व खुलासां स्पष्ट याइ । आः वइगु आम चुनावय् नं मू लक्ष्य गणित हे जुइ । गुगुं नं रणनीतिक हर्कत छ्यलाः गठबन्धनं थःत माःगु गणित चूलाकी । गणित प्राप्तिया निंतिं दत्तचित्त जुइ । डा. महतं थःगु स्वीकारोक्ति प्रष्ट याइ । आगामी चुनाव थःगु दलया आग्रह सिद्धान्त मखु । गणित खः ।
ख नं खः । सैद्धान्तिक दृष्टिं कांगे्रस व कम्युनिष्ट विपरित ध्रुव धाइ । अझ जन आन्दोलनया इलय् ला तात्कालीन प्रम देउवां कमरेड प्रचण्डया छ्यं ध्यना हःम्हेसित पुरस्कृत यायेगु घोषणा याइ । तर वखँ थौं । किम्बदन्ती बाखं थें जुइ । काल्पनिक किस्सा थें । थौं वयाः बाागमतिइ यक्व लः न्ह्यायेधुंकल । कांगे्रसया देउवा व कम्युनिष्टया प्रचण्डया स्वापूया आधार सैद्धान्तिक मखयेधुंकल । राजनीतिक गणित स्वार्थ जुइ । खनेदइ । राज्यशक्ति हड्पे यायेगु मूल लँपु थौं सैद्धान्तिक आकर्षण मखु, गणित जुइ ।
थ्व हे गणितमुखी राजनीतिं थौं विपरीत ध्रुवीय नेतातय्त नं ला व लुसि थें सामिप्यताय् हयाबी । मंकाः राजनीतिक गणितीय लक्ष्य प्राप्तिया निंतिं थौं दलया नेतातय्सं सिद्धान्तयात छ्वासे वाये यंकेधुंकूगु दु । देशय् चुनाव वयाच्वन । प्रत्येक चुनावं न्हूगु सम्भावना, हिउपाः हइ । जनतां आशा याये दयेमाःगु खः। विश्वास याये दयेमाःगु खः । चुनावय् ल्वाइपिं उम्मेदवारतय्सं नं मतदातातय्त उज्ज्वल भविष्य क्यनाः आकर्षण यायेमाःगु खः ।
तर विडम्बना ! थौं चुनावय् दलया नेतातय् कुतः जनताया मत आकर्षित यायेगु स्वयां नं गणितया निंतिं जालझेलया ग्वसाः ग्वयेगुलिइ तत्पर । चुनाव स्वच्छ जुइ धइगु खँय् थौं जनतां विश्वास याये फइगु स्थिति मदु । सिद्धान्तहीन गणितपरक राजनीतिं देय्यात थौं गनं गन थ्यंकल । छर्ल· ।
देय्या राज्यया सम्पूर्ण अंगत थौं भताभु· जूगु खँ क्यनी । थौंकन्हय् निलम्बित प्रधान न्यायाधिशया महाभियोगया सिलसिलाय् सुनुवाइ जुयाच्वंगु दु ।
सुनुवाइया इलय् निलम्बित प्रधानन्यायाधिशं थःगु प्रतिरक्षा याइ । तर थःगु प्रतिरक्षा बाहेक निलम्बित प्रधान्यायाधिश चोलेन्द्र शम्शेर राणां हालया नेपाःया न्यायिक ख्यःया भाँडभैलो, विकृति, विसंगति विषयय् नं चर्चा याइ । व चर्चा न्यनेबलय् सम्पूर्ण नेपाःमितय्त म्ह पिइसे च्वनी । जनता असुरक्षित जुइ । न्यायया स्रोत, केन्द्र सर्वोच्च अदालतया हालत थुलि क्वह्यने धुंकल कि थुकियात सर्वोच्च अदालत धायेगु नं लज्जास्पद खँ जुइ
पवित्र न्यायिक क्षेत्रया दुर्गतिया कारण देशय् ब्वलनाच्वंगु गणितया राजनीति खः । गणितया राजनीतिं गगुं हर्कत छ्यलाः शक्तिइ वइपिं नेतातय्सं थःगु प्रभाव देय्या सम्पूर्ण ख्यलय् लाकी । शक्तिया प्रदर्शन याइ । थःगु स्वार्थ पूर्ति यायेगु वातावरण दयेकी । हालिमुहालि याइ । पिनें स्वतन्त्र न्यायालय धाःसां थौं न्यायालयया दुर्दशा बाह्य राजनीतिक हस्तक्षेपया कारणं खः ।
राजनीतिक दबाव, हस्तक्षेपं न्यायपालिका गाक्कं पीडित धइगु खँ भूपू प्रधानन्यायाधिश सुशीला कार्कीं छगू अन्तर्वार्ताय् प्वंकूगु दु । ‘नकचरा नाचे हजार दावे’ धाःथें थौं आदर्श, सिद्धान्तहीन, गणितया भरय् शक्तिइ वःपिं नेतातय्सं थःगु ‘नकचरा नाच’ चौतर्फि प्रदर्शन यानाच्वंगु दु । यानाच्वनी ।
वइगु चुनावय् नं अनेक चलखेल, षडयन्त्र यानाः थःगु विजय सुनिश्चित यायेत नेतात थःगु स्वार्थ अनुकूल गणित दयेकेत स्वयाच्वंगु दु । देय् जनताप्रति प्रतिवद्ध न्हूगु पुस्तां थुमित परास्त यायेमाः ।
LEAVE YOUR COMMENTS