उदाय समाजय् हाकनं डा. रुपज्योति

येँ – उदाय समाजया न्हय्क्वःगु तःमुँज्यां डा. रुपज्योति कसाःयात हे हाकनं नायः पदय् ल्यःगु दु । न्हूगु ज्यासना पुचःया निंतिं जूगु ल्यज्याय् वय्कः अत्याधिक मतं नायः पदय् मेगु कार्यकालया निंतिं निर्वाचित जुयादीगु खः । नायः पदया निंतिं जूगु निर्वाचनय् वय्कलं निवर्तमान नायः पञ्चवीर सिंह तुलाधर व अमिररत्न ताम्राकारयात बुकाः निर्वाचित जुयादीगु खः ।

थुकथं हे ज्यासना पुचःया निंतिं जूगु निर्वाचनय् स्वम्ह मिसा दुजः व स्वम्ह खुल्ला दुजःया निंतिं नं मतदान जूगु खः । समाजया न्हय्क्वःगु तःमुँज्यां न्हूगु ज्यासना पुचःया मेपिं दुजलय् रजनी ताम्राकार, दिव्यरत्न स्थापित, सुमित्रा तुलाधर, भवानी तुलाधर, दिव्यलक्ष्मी कसाः, मिना तुलाधर निर्वाचित जुयादीगु दु । थुकथं हे समाजया दुजलय् उदाय समुदायया थीथी कवःपाखें छ्वया हःपिं प्रतिनिधिपिं नं निर्विरोध निर्वाचित जूगु घोषणा याःगु खः ।

डा. ज्ञानेन्द्ररत्न तुलाधर, प्रविणरत्न तुलाधर, राजकुमार कंसाकार, अमृतमान ताम्राकार, डा. प्रेमरत्न स्थापित, प्रेमकाजी बनिया, ज्ञानराजा सिख्राकार, गौरीशोभा सिन्दुराकार, सुदयराज शिलाकार व निलकमल सेलालिक समाजया दुजःया निंतिं थीथी कवःपाखें प्रतिनिधि जुयादीगु खः । ज्यासना पुचःया ल्यज्याया निंतिं पुष्परत्न तुलाधरया संयोजकत्वय् पूर्णरत्न तुलाधर व पूर्ण ताम्राकार दुजःकथं च्वनादीगु निर्वाचन कमिटी गठन याःगु खः ।

निर्वाचन लिपा संयोजक तुलाधरं निर्वाचित जुयादीपिनिगु नां घोषणा यानादीगु खः ।थ्व स्वयां न्ह्यः समाजया नायः डा. रुपज्योति कसाःया सभापतित्वय् जूगु झिंखुक्वःगु दँमुँज्या व न्हय्क्वःग तःमुँज्या वय्कलं हे त्वाःदेवाय् मत च्याकाः उलेज्या यानादीगु खः ।

समाजया न्वकु डा. प्रेमरत्न स्तथापितं लसकुस यानादीगु ज्याझ्वलय् मूछ्यांजे स्वयम्भूरत्न तुलाधरं वार्षिक प्रगति व दांभरिं जयेन्द्रमान सिंह बनियां आर्थिक प्रतिवेदन न्ह्यब्वयादीगु खः । ज्याझ्वलय् शैक्षिक ख्यलय् उत्कृष्ट ल्याः हयादीपिंत हनेगु व सिरपाः नं लःल्हाःगु खःसा ज्याथजिथिपिं नापं थीथी पेशा यानाच्वंपिंत नं हनेज्या याःगु खः ।