३ नम्बरया राजधानी अनिश्चित

३ नम्बर प्रदेशया स्थायी राजधानी बारे मोहनि लिपा सहलह यानाः क्वःछीगु धाःसां स्वन्ति न्ह्यः राजधानी क्वःछी मफइगु जूगु दु । मोहनि नखःया झ्वलय् स्थगित जूगु संसदया बैठक गबले तयेगु धइगु निर्णय मजूगुलिं प्रदेशया राजधानी बारे निर्णय याये लिबाइगु खँ प्रदेशसभा सांसद बसन्त मानन्धरं ‘नेपालभाषा टाइम्स’ यात कनादिल । वय्कःया कथं बैठक अनिश्चित जूगुलिं प्रदेशया राजधानी क्वःछीगु खँ नं अनिश्चित जूगु खः । प्रदेशया राजधानी क्वःछीत नीस्वंगु समितिं प्रदेश सरकारयात थःगु प्रतिवेदन लःल्हाये धुंकूगु दुसा उकियात कयाः सहलह लिपा राजधानी क्वःछीगु तयारी प्रदेश सरकारं यानाच्वंगु दु ।

प्रदेशया स्थायी राजधानी तयेगु निंतिं येँ, भ्वत, ख्वप, नुवाकोट व हेटौंडाया नां प्रस्तावित जुयाच्वंगु दु । प्रदेशसभाया आपालं सांसदतय्सं हेटौंडा राजधानी तयेगु पायक मजू धासें भ्वत वा ख्वपय् तयेमाःगु माग याना वयाच्वंगु दु ।

मेखे हेटौंडाया सांसदतय्सं धाःसा राजधानी मेथाय् यंके दइमखु धकाः विरोध यायेगु जक मखु राजधानी मेथाय् यंकल धाःसा आन्दोलन यायेगु ख्याच्वः तकं बियाच्वंगु दु । अथेहे प्रदेशया मुख्यमन्त्री डोरमणि पौडेलं नं हेटौंडायात हे राजधानी कायम यायेमाः धइगु खँय् बः बियाः वयाच्वंगु दु ।