न्हिथं थहां वनाच्वंगु लुँया भाः तोलां १३०० कुहांवल

येँ (नेपालभाषा टाइम्स) – नेपाःया लुँवहः बजारय् लुँया भाः हाकनं कुहां वंगु दु। निरन्तर रुपं थहां वनाच्वंगु लुँया भाः म्हिगः तोलाय् छक्वलं १३०० तका कुहां वःगु खः । अमेरिकी डलरया अवमूल्यन जूगुलिं निरन्तर रुपं लुँया भाः थहां वनाच्वंगु विश्लेषण नेपाल सुनचाँदी व्यवसायी महासंघया पुलांम्ह अध्यक्ष लिसें बजार विश्लेषक तेजरत्न शाक्यं यानादी । वय्कःया कथं अमेरिकी डलर कमजोर जुइवं लगानीकर्तात लुँइ आकर्षित जुयाः लुँया भाः थहां वनाच्वंगु खः ।

तर लुँइ लगानी याःपिंसं थःगु लबः क्यनेगु निंतिं बजारय् लँ मीगु शुरु यायेवं लुँया भाः कुहां वःगु वय्कःया विश्लेषण दु । वय्कःया कथं बजारय्डि मान्ड स्वयां सप्लाई अप्वः जुइवं लुँया भाः कुहां वःगु खः । वंगु बुधवाः तक अन्तर्राष्ट्रिय बजारय् लुँ प्रति औंस १९४६ डलरं कारोबार जूगु खःसा म्हिगः १९ डलर कुहां वयेवं तोलां १३०० तका कुहां वःगु खः ।

अन्तर्राष्ट्रिय बजारय् लुँया भाः थहां कुहां जुयाच्वंसां नं नेपालय् धाःसा उकिया लिच्वः खास हे मलाःगु खँ नं शाक्यं कनादिल । थौंकन्हय् अफसिजन जूगुलिं लुँया व्यापार शून्य धाःसां जिउ ।अझ थुगुसी माघ व फागुन महिनाय् तकं लगन मदुगुलिं लुँया व्यापार खास हे जुयाच्वंगु मदु ।
‘अन्तर्राष्ट्रिय बजारय् भाः थहां वन धाःसा थन नं थहां वनी, कुहां वल धाःसा थन नं कुहां वइ’ वय्कलं कनादिल ।