तोबु वल्र्ड स्क्वायर

चन्द्रमान महर्जन

तोबु वल्र्ड स्क्वायर जापानया राजधानी टोकियों थ्यंमथ्यं १२५ किमिया दूरीइ ‘टोचिगी को निक्को’ धाःगु थासय् दु । थन विश्वया चर्चित सछि व निगू थीथी सम्पदास्थल व भवनतय् नमूना दयेकाः तयातःगु दु । थुकी मध्ये ४७ गू विश्व सम्पदाया धलखय् दुथ्यानाच्वंगु सम्पदास्थलत लाः । उकिं थ्व थासय् थ्यनेवं छगू बिस्कं संसारया अनुभूति जुइ ।

थन नमूनाया रूपय् दयेकाः तयातःगु भवन धाथेंया भवनया नीन्याब्वय् छब्व (१ः२५) पाय्धंगु जुइ । विश्वय् छुं नं चर्चित भवन दयेकल धाःसा थन नं उकिया मोडल दयेकाः तयेगु याइ । गथेकि विश्वय् नांजाःगु अमेरीकाया वल्र्ड ट्रेड सेन्टर, स्ट्याच्यु अफ लिर्बटी, जापानया टोकियोया टावर स्काई ट्री, इजिप्टया पिरामीड, फ्रान्सया आइफेल टावर, नेडरल्यान्डया शान्त दरवार आदि ।

थन झी जःलाखःला देय् भारतया नांजाःगु ताजमहलया नं नमूना दयेकाः तयातःगु दु ।विश्वया नांजाःगु सम्पदा स्थल व भवन स्वयेगु निंतिं थन म्वःम्वः पर्यटकत वयेगु यानाच्वंगु दु । थुपिं चर्चित थाय्त धाथें स्वयेगु खःसा विश्व भ्रमण यानाः यक्व दां फुकेमालीगु जुइ, तर उकिया नमूना स्वयेगु निंतिं छुं भचा जक दां दःसां गाइगु जूगुलिं नं थ्व थाय् पर्यटकतय् निंतिं आकर्षणया थाय् जुयाच्वंगु दु ।