येँ – काभ्रे जिल्लायात ३ नम्बर प्रदेशया राजधानी दयेकेमाः धासें ३ नम्बर प्रदेशया सांसदपिं नेकपा (एमाले) या चन्द्र लामा व
नेकपा (माओवादी केन्द्र) या रत्न ढकालपिंसं प्रस्ताव दर्ता यानादीगु दु । अथेहे ख्वपयात राजधानी प्रदेश दयेकेमाः धकाः एमालेया शशीजंग थापा व हरिशरण लामिछाने लगायतया सांसदपिंसं मेगु प्रस्ताव दर्ता याःगु खँ नं सीदुुगु दु । ख्वपयात प्रदेशया राजधानी दयेकेमाः धकाः प्रस्ताव तयेगुया लिसें राजधानी दयेकेमाःगु झिगू आधार नं वय्कःपिंसं न्ह्यब्वयादीगु खः ।
सांसद राजकाजी महर्जनं ‘नेपालभाषा टाइम्स’ लिसे खँ ल्हासें निगुलिं थासय् प्रदेशया राजधानी तयेत प्रस्ताव वःगु जानकारी बियादिल । आः तक राजधानीया बारे छुं खँ मजुयाच्वंगु इलय् संसदय् याकनं हे राजधानीया बारे क्वःछीमाःगु माग जूगु जानकारी नं वय्कलं बियादीगु दु । आः तक हेटौंडायात अस्थायी राजधानी जक क्वःछिनातःगुलिं याकनं हे स्थायी राजधानी नं क्वःछीमाः धासें सदनय् थीथी पार्टीया आपालं सांसदपिंसं सः तःगु खः ।
सूत्रया कथं काभ्रेयात राजधानी दयेकेगु खँय् आपालं सांसदत सहमत जुयाच्वंगु खनेदु । आः हेटौंडाय् कायम जुयाच्वंगु अस्थायी राजधानी रामेछाप, सिन्धुली, सिन्धुपाल्चोक जिल्लाया सांसदपिंत पायक मजू धासें काभ्रेय् तयेमाःगु माग उगु क्षेत्रया सांसदपिंसं यानाच्वंगु खँ धाःगु दु । थ्व स्वयां न्ह्यः नुवाकोटय् स्थायी राजधानी तयेमाः धकाः नुवाकोटया सांसदपिंसं नं प्रस्ताव दर्ता याःगु खः ।
LEAVE YOUR COMMENTS