सुभद्राया चिल्लाय्

आनन्द सिद्धि तुलाधर

मदुम्ह पासा कमल प्रकाश मल्लया चीधिकःम्ह किजा कृष्णसुन्दर मल्लं फोन यानाः जितः धयाहल, “कन्हय् सुथय् झिताः ईनिसें थाय्मदुइ जिगु छेँ ‘थकू छेँय्’ मदुम्ह दाइया बिचाः फयेगु जुल । दाइया मचाबलय्या पुलांम्ह पासा छि, म्हंफुसा बिचाः हायेकेत झायादीसां जिउ । दाइया मेपिं पुलांपिं पासापिंत नं छकः सुचं बियादीसां जिउ ।”
पासापिं हेरम्ब बहादुर राजभण्डारी, अच्युत बहादुर राजभण्डारीपिंत जिं फोनं हे सुचं बियाछ्वया ।

उमिसं मेपिं पासापिंत नं सुचं बियेत इनाप यानाछ्वया । म्ह्याय् दिव्या पासा थ्वयाः जि इलय् हे थकू छेँय् थ्यंकः वना । बिचाः हायेकेत वःपिं नं थ्यंकः वयेधुंकल । वयां च्वन तिनि । बिचाः फयाच्वंपिं कमलप्रकाश मल्लया स्वम्ह किजापिं श्याम सुन्दर, बालसुन्दर व कृष्णसुन्दर, केहेँ गंगा, भिंचा अमृतमान श्रेष्ठ (भान्जा) व मेपिं छेँजःपिं दु । बिचाः हायेकः वःपिं गुम्हं ताउत तक च्वन ।

गुम्हं भचा याकनं वना छ्वत । जि भचा ताउत तक हे च्वना । जिं अन कमल प्रकाश मल्लया तता सुभद्रायात मखना । मदुम्ह किजाया बिचाः हायेकेत वइ धयागु जिगु मतिइ । गुइदँ पुले धुंकूम्ह मफयाः मथ्यने नं फु । जितः धाःसा सुभद्रा तता नापलायेगु तसकं मन जुयाच्वन । यक्व यक्व हे दँ दये धुंकल नापलाये मखंगु । ख्वाः स्वये आपुलु जुयाच्वंगु उलिथुलि हे मदु जितः ।

पाजुपिं नापं च्वनाः बिचाः फयाच्वंम्ह भान्जायाके वया मां बिचाः हायेकेत वइ लाकि वइमखु धकाः न्यं हे न्यना । “ब्वनाहिँ धकाः धया छ्वये धुन छेँय्, मां वइ, मांयात ब्वनाहइ पाजु” धकाः भान्जां लिसः बिल । जितः नं न्हापांनिसें वं पाजु हे धाइगु । पासा ब्वनाहयाम्ह म्ह्याय्यात भान्जां धाःगु खँ कनाः जिपिं भचा लँच्वनेगु सल्ला ब्याका ।सुभद्रा तता क्वथाय् दुने थ्यन ।

निम्हसिनं निखे ल्हाः ज्वनाः लुचुलुचु यानाः जिगु लिक्क सोफाय् फ्यतुके हल । मिखा, न्हाय्पं सुथां लाःनि धाःगु । उखे थुखे मिखा ब्वयाः स्वःबलय् मिखा प्वाल्ल थी, यचुसे च्वं । जितः ला स्व नं मस्वः । म्हमसिइ धुंकल जुइ, ल्वःमने नं धुंकल जुइ । नापलानाः ख्वाः चूमलाःगु नं यक्व हे दये धुंकल । पलख पियाः नं जिपाखे स्वयाः छुं मधाःगुलिं जितः थःत म्हसिइके बिइगु आशां जिं धया, “तता, जि आनन्दसिद्धि का, कमलप्रकाश मल्लया पासा आनन्द सिद्धि ।”

ताःला मताःला यात । चेतना शक्ति बमलाये धुंकूम्ह थें सुयातं न्वं नं मतू, उखें थुखें जक स्वयाच्वन । जि आशांद्याकाः च्वने माली धइथें जिगु नुगः भाराभारा मिन । ततां थःत म्हसिइके बियेत हाकनं जिं कुतः यानाः धया — “जि कमलाया पासा, आनन्द सिद्धि, कमलाया पासा ।” कमलप्रकाश मचाबलय् छेँय् थजिपिसं वइत ‘कमला’ धाइगु खः । वं न्हापा थःगु नां ‘कमला प्रकाश मल्ल’ च्वइगु जितः लुमंथें लुमंथें च्वं ।

जिं थुलि छु धाये लात तता “कमला……….” धयाः म्हय् दक्व बल पिकयाः चिल्लाय् दनाः हाल । काचां काचां छम्ह मिसां म्हुतु प्वातिका बिल । निम्हेसिनं ज्वनाः मेगु क्वथाय् यंकल । व चिल्लाय् सलं बिचाः फयाच्वंपिं स्तब्ध, बिचाः हायेकः वःपिं स्तब्ध, क्वथा छगुलिं स्तब्ध । गुलिचां मदुवं तता सुभद्रा नं मदुगु बुखँ वल । वइगु चिल्लाय् कमल प्रकाश मल्लं ताल मखा जुइ ।

 

सम्बन्धित बुखँ

LEAVE YOUR COMMENTS