मनपापाखें निःशुल्क वाइफाइ सेवा संचालन
येँ – येँ महानगरपालिकां थःगु कार्यक्षेत्र दुने लाःगु थीथी थासय् निःशुल्क (फ्री) वाइफाइ सेवा शुरु याःगु दु । येँ मनपां मनूत चाप अप्वइगु व आवश्यक थाय् स्वयाः येँया हनुमाध्वाखा लाय्कू, स्वयम्भू, पशुपति, खास्थि, बालाजु बाइसधारा पार्क, शंखपार्क लगायत धार्मिक, सांस्कृतिक, पर्यटकीय व सम्पदा क्षेत्रय् निःशुल्क वाइफाइ सेवा संचालन याःगु खः ।
येँ महानगरपालिकाया प्रमुख विद्यासुन्दर शाक्यं छगू ज्याझ्वःया दथुइ उगु वाइफाइ सेवाया उलेज्या यानादीगु खः । प्रमुख शाक्यं येँ महानगरपालिकाया घोषित ज्याझ्वःकथं येँया प्रमुख खुगू थासय् निःशुल्क वाइफाइ सेवा संचालन यानागु जानकारी बियादिल । येँ मनपां उगु सेवा वल्र्डलिंकया साझेदारीइ संचालनय् हःगु खः ।
येँ मनपा व वल्र्डलिंक दथुइ वंगु चैत १८ गते सेवा संचालनया निंतिं छगू सहमति जूगु खः ।ज्याझ्वलय् नवासें येँ मनपा प्रमुख शाक्यं येँ महानगर लागायात स्मार्ट सिटीया रुपय् विकास यायेगु व येँ महानगर लागायात प्रविधिलिसे सम्बन्धि मेमेगु ज्यायात नं निरन्तरता बिया वनेगु प्रतिवद्धता प्वंकादिल ।
लिसें वय्कलं येँया अतिकं व्यस्त बजाःमध्ये छगू थनया न्हूसतकय् च्वंगु धर्मपथय् ‘स्मार्ट पार्किङ भवन’ निर्माण यायेगु घोषणा नं उगु इलय् यानादिल । थुगु वाइफाइ मेमेगु निःशुल्क वाइफाइथें धाःसा संचालन जुइमखु । थुगु सेवा कायेत प्रयोगकर्तां सेवा कायेगु वाइफाइया पेजय् थःगु नां व मोबाइल नं. बीमाः । वयां लिपा सिस्टमं छ्वयाहःगु कोडयात जायेकेधुंकाः जक वाइफाइ सेवा काये फइ ।
अथे हे थुगु सेवा प्रयोगकर्तां छन्हुया निंतिं बाघौ (३० मिनेट)जक छ्यले फइ । वयां लिपा वाइफाइ कनेक्शन थः हे बन्द जुइ । वाइफाइ प्रयोग सकसिगुं पहुँचय् थ्यनेमा व दुरुपयोग यायेगु ज्या मजुइमा धइगु ल्याखं थुकथंया व्यवस्था यानातःगु खः । प्रयोगकर्तां फोन वा ल्यापटप छगू हे डिभाइसं सेवा कायेबलय् निक्वःखुसी ईमेल नं उपलब्ध यायेमाः ।
LEAVE YOUR COMMENTS