झीसं पुण्यानुमोदन यायेमाः

प्रकाश शाक्य ‘नःघः’

बुद्ध धर्मय् दीक्षित जुयाच्वंगु थुगु जन्मय् नं वंगु जनमय् नं सुख व शान्ति दयेमाः धकाः दानधर्म व पुजापाठ यानाः पुण्यगु कर्म यानाच्वनी । विशेष यानाः थेरबादया बुद्धधर्मय् न्ह्यागु धार्मिक ज्याझ्वःया अन्तय् पालिभासं च्वयातःगु पुण्य बन्दना सुत्त ब्वनाः क्वचायेकी । थुकियात पुण्यानुमोदन कर्म धाइ ।

पुण्यानुमोदन अर्थ थ्व सम्पन्न जूगु पवित्रगु कार्य लाइगु पुण्य झीत जक मखु सकल प्राणिपिंत नं पुण्य लानाः भिं जुइमा धकाः कामना यायेगु खः । बुद्ध धर्मय् छगू मू तातुना थ्व जक उद्धार जुइगु मखुसे सकल प्राणीपिंत नं उद्धार यायेगु खः । थ्व पुण्य बन्दनाया प्यंगूगु श्लोकय् मध्येय् न्हापांगु श्लोक थथे खः– इदमे नां ज्ञाति नं होतु सुखिता होतु ञातयो (स्वकः ब्वनेगु) अर्थात थ्व पुण्यया ज्यां थःथिति नापं म्हस्यूपिं दक्व नं सुखी जुइमा ।

बुद्ध धर्मया त्रिपिटक मध्ये छगू अभिधर्म खः । अभिधर्मय् विशेष यानाः मनूतय्गु चित्त सम्बन्धि खँत दुथ्यानाच्वंगु ग्रन्थ खः । शाक्यमुनि बुद्धं थः मां नं मेगु थासय् जन्म काःवंथाय् वनाः थ्व धर्मया खँ कनाः वसपोलयात निर्वाण पदवी लाकाबिज्याःगु खः । (बौद्ध साहित्य थ्व थाय् धयागु स्वर्ग लोकया त्रापस्त्रिंस भूमि धाइ । वास्तवय् थ्व थाय् नमोबुद्ध, नमरा खः ।)

पुण्य धयागु छु खः ? थ्व धयागु थ्व हे खः धकाः क्यने थाकु । जब मनूतय्त दान धर्मया फलं मंगल जूगु खनी, अबलय् तिनि पुण्य धाःगु म्हसिइ ।

अभिधर्म कथ प्राणीत थ्व संसारं च्यूत जुइगु कारण प्यता दु– आयु क्षय, कर्म क्षय, उभयक्षय व उपच्छेद कर्म । थुगु जन्मय् न्ह्याक्व हे पुण्यगु ज्या याःसां न्हापायागु जन्मय् यानावःगु अकुशल कर्म याकनं च्युत जुइगुयात आयुक्षय धाइ । थुकिया अःखः कर्मक्षय धयागु न्हापायागु जन्मय यक्व पुण्य कमे यानातःगु दुसां थुगु जन्मय् याःगु अकुशल कर्म च्युत जुइगु खः ।

न्हापायागु जन्मय् नं आःयागु जन्मय् नं याःगु पुण्य नापनापं फुनाः याकनं च्युत जुइगुयात उभयक्षय धाइ । न्हापायागु जन्मय् नं आःयागु जन्मय् नं यक्व हे पुण्यगु ज्या यानाः आयु यक्व ताःहाकःसां मेगु छुं कारणं च्युत जुइगुयात उपच्छेद कर्म धाइ । थुकियात पाल्चां दसु बियाः क्यनातःगु दु ।

यदि न्हापायागु जन्मया कर्मं पाल्चाय् यक्व चिकं दुसां थुगु जन्मय् मयाःगु पुण्यया चिं इताः चीहाकः जुयाः याकनं मत सीगु धयागु आयुक्षय खः । थ्वया अःखः थुगु जन्मय् याःगुया फलं इताः ताःहाकः तर न्हापायागु जन्मय् पुण्यगु कार्य मयाःगु कारणं चिकं म्हो जुयाः पाल्चा याकनं सीगुयात कर्मक्षय धाइ ।

न्हापा यानावःगु पुण्य व आःयागु पुण्य नापनापं फुनाः मत सीगुयात उभयक्षय धाइ । न्हापायागु जन्मय् नं आःयागु जन्मय् नं यक्व हे पुण्यगु ज्या यानाः चिकं नं यक्व, इता नं ताःहाकः जुयाः च्यानाच्वंगु पाल्चा वा, फय् वा मेगु छुं कारणं सित धायेवं थ्वयात उपच्छेद कर्मं सीगु धाइ । झीसं पुण्यानुमोदन यायेगु कारण न थ्व हे खः कि थज्याःपिं सत्वपिंत माःमाःगु पुण्य बियाः थ्व संसारं याकनं च्यूत मयाकेगु खः ।

पत्तिदान व धर्मराज
बुद्ध धर्मय् पुण्यानुमादन थें मेगु छगू ज्वलाःगु पुण्य पत्तिदान खः । पालि भासं पत्तिदानया अर्थ थथे याना बियातःगु दुकि पतब्वाति ति पत्ति, पत्तिया दानं पत्तिदानं अर्थात पुण्य यानाः प्राप्च जूगुयात पत्ति धाइ, व हे प्राप्त जूगु पुण्यं मेपिं सत्वपिंत नं उद्धार यायेत बीगुयात पत्तिदान धाइ ।
पत्तिदान नाप धर्मराजनाप स्वानाच्वंगु छगू बाखं थथे दु ।

अकुशल कर्मं मनूत छु गति लाःवनी धयागु खँ यमलोकया जुजु यमराजं बांलाक हे सिउ । अय् जूगुलिं वं फयांपत्ति धर्म तयाः सुयात नं नरकय् ध्वयेगु कार्य मयाः । थथे धर्म तयाः ज्या याइगुलिं वयात धर्मराज धाःगु खः । धर्मराज थाय् नं यक्व पुण्यगु ज्या यानाः तप्यंक स्वर्गय् लाइपिं वयेमाः न अकुशल कर्म जक यानाः तप्यंक नरकय् वनीपिं वयेमाः।

वयाथाय् दथुइ लाःपिं सत्वपिं जक वइगु खः । छकः ६४५ सत्व थ्व संसारं च्युत जुयाः धर्मराजथाय् वयाः जि म्वाःसां म्वाःसां थःगु जन्म दिंया रागय् लानाः यक्व निर्दोष प्राणीपिं हत्या यानागु पापं जिगु नरक गमन सुनानं पने मफइगु जुल धकाः ख्वख्वं बिलाप यानाच्वन । धर्मराजं वयात नरकय् मछ्वयेकेगु लागि छु ल्वगिपिं खं ला ? मस्त खं ला ?

प्वाथय् दुपिं मिस्त खं ला ? बुराबुरीपिं खं ला धकाः न्ह्यसःत न्यन । व मनुनखं जिं खं जक धाःसां धर्मराजं थ्व थुमित करुणा तयाः कुशल कर्म याःगु दु धकाः नरकय् मछ्वइगु खः । तर व मनुखं जि तसकं प्रभादितय् (मोजमस्ति) जक लानाच्वन अर्थात मखं धयाबिल । हानं धर्मराजं थ्व पत्तिदान याःगु दु ला धकाः थःगु दिव्यदृष्टिं स्वल ।

पुण्य धयागु छु खः ? थ्व धयागु थ्व हे खः धकाः क्यने थाकु । जब मनूतय्त दान धर्मया फलं मंगल जूगु खनी, अबलय् तिनि पुण्य धाःगु म्हसिइ । बुद्ध धर्मय् थथे च्वयातःगु दु कि अलोभ, अद्वेष व अमोह थेंज्याःगु कुशल कार्यं पुण्य संचय जुइ । थ्व धाःगुया अर्थ छु कथं नं लोभ मयायेगु, सुं प्रति नं द्वेष भावम तयेगु व छु वस्तुप्रति नं मोह मतयेगु कार्यं हे पुण्य संचय जुइ ।

थज्याःगु कशल कार्यं थःगु जीवन नं मेपिनिगु जीवन नं सुखमय जुइ । अझ थथे नं धायेगु याःकि थज्याःगु कुशल कार्य याइपिं मेगु जन्मय् द्यःपिं जुयाः स्वर्गय् जक जन्म जुइ । थथे धाःगुया अर्थ थुगु हे जन्मय् द्यःपिं थें दक्वसिनं माने याइ ।

सम्बन्धित बुखँ

LEAVE YOUR COMMENTS