ने. सं. ११४६ बछलाथ्व चौथी - बुंगद्यः सालिगु

अश्वघोष भन्तेया स्वास्थ्य स्थिर

येँ – आः दुपिं भन्तेपिं मध्ये दकलय् ज्याथम्ह भिक्षु संघनायक अश्वघोष महास्थविरया स्वास्थ्य स्थिर जूगु दु । वसपोलयात थौंकन्हय् तोखाया ग्राण्डी इन्टरनेशनल अस्पतालय् तयाः वासः याकातःगु खःसा अन वसपोलया स्वास्थ्यय् सुधार मजूगु खँ अखिल नेपाल भिक्षु महासंघया सचिव भिक्षु कोण्डन्यं ‘नेपालभाषा टाइम्स’ यात कनाबिज्याःगु दु ।

थौंकन्हय् वसपोलयात अनया हाइचेयर युनिटय् तयाः उपचार याकातःगु दुसा वसपोलया उपचारय् डा. अमित गौली खटे जुया च्वनादीगु दु ।
थौंकन्हय् भिक्षु अश्वघोषया ब्लड प्रेसर म्हो जुजुं वनाच्वंगु व स्वँलाय् निमोनिया नं खने दया वःगु दु ।

क्रिटिना अप्वयाः जलस्येँय् नं खराबी वःगु जुयाः आः वसपोलया स्वास्थ्यय् खास सुधार मजूगु खँ चिकित्सकतय्सं धाःगु दु ।९३ दँ दुम्ह अश्वघोष भन्ते छुं ई न्ह्यः सामान्य झाराबान्ता जुयाः अस्पतालय् क्यं बिज्याःगु खःसा स्वास्थ्य परीक्षण लिपा वसपोलयात अस्पतालय् तुं भर्ना यानाः उपचार शुरु याःगु खः ।