ताप्लेजुङ्गया हेलिकप्टर दुर्घटना
दावा छिरिङ्ग शेर्पा ! छम्ह सफल पर्यटन व्यवसायी । ताप्लेजुङ्ग वनेत तयार जुयाः पिहां वल । कलाःम्हं खादां क्वखायेकाः बिदा बिल । मोटरय् च्वने त्यंम्ह साहुयात चौकिदार खगेन्द्रं विस्तारं धाल, ‘अनुमति दुसा छता खँ कने ला साहुजी ?’
‘जिउ कँ । छु खँ ?’ साहुजी मोटरया खापा चायेकु चायेकुं न्यन ।
‘जिं थौं…’ कने ला मकने ला थें यानाः खगेन्द्रं धाल, ‘म्हगसय् हेलिकप्टर छगः दुर्घटनाय् लाःगु खना । जिउसा छिं सा…’ध्वाखापिवाः खगेन्द्रं ल्हाः प्यपुंकाः इनाप यात, ‘थौं छकः हवाइ यात्राय् झायामदीत बिन्ति याना ।’‘छु अल्छिाणा खँ ल्हाः वयाच्वंगु थ्व मनुखं धयाथें साहुजी पलख वाताहाँ च्वन । ख्वालय् मयःगु भाव खनेदत ।
हाकनं तुरुन्त हे लुमन – वया दाजुकिजा नं पालंपाः हेलिकप्टर दुर्घटनाय् लायेधुंकल । दाजु सि हे सित । किजायात घाःपाः जक जुल । व म्वात । मेमेगु नं छु छु लुमन खः मसिउ, दावा छिरिङ्गं थौं यात्राय् मवनेगु हे क्वःछित । सुथसिया ८ः३१ य् ब्वःगु एअर डाइनेस्टीया हेलिकप्टर अथे हे १०ः४५ ताः इलय् ताप्लेजुङ्गय् थ्यन ।
चुहानडाँडा धाःगु थासय् विमानस्थलया सम्भाव्यता निरीक्षण अध्ययनया निंतिं वःगु पुचलं औपचारिक सभा समारोह सिधयेवं अनया पाथीभरा द्यः छकः नं दर्शन याःवनेगु मन यात । अथे हे देगलय् १०÷१५ मिनेट जक बित खइ, देवीया दर्शन यानाः उपिं लिहां वल ।
मौसम बांमलाः थौं । सुथंनिसें खसुं भुनातःगु सर्गः ।
तुरुन्त हे च्वापुवा गायेगु सुरु जुल । ‘तसकं हे च्वापु वा गायावल । ब्वये फइ थें मखना मन्त्रीज्यू’ हेलिकप्टरया चालक विभाकर केसीं धाःगु जुल थ्व । खबर ताप्लेजुङ्गया टावरय् नं थ्यन । मन्त्री कन्हय् हे मेगु अध्ययन भ्रमणय् जर्मनी वनेमाःम्ह जुयाच्वन । अन उमि छु छु खँ जुल, मसिल । हेलिकप्टर ब्वःगु १ मिनेट दुने हे छगू तःधंगु दुर्घटनाय् लात ।
बे्रकिङ्ग न्यूज धकाः एफएमतसें समाचार पिथन । ‘जस्ट नाउ’ धकाः फेसबुकय् पोष्ट यानाहल । पौने २ बजे ति ला औपचारिक रुपं हे पुष्टि जुल । पर्यटनमन्त्री च्वनावःगु हेलिकप्टर सिस्नेभीर धाःगु गुँच्वय् ठक्कर नयाः कुतुं वन । मि च्यानाः उकी सवार यात्रु फुक्कं सित ।
खबर न्यनाच्वंम्ह दावा छिरिङ्ग सी म्वाल । वयात छगू न्हूगु हे जन्म जूगुति ग्यन ।
वं तुरुन्त चौकीदारयात सःतकेछ्वत । ‘ना छगू लाख दां । थ्व छंत जिगुपाखें इनाम जुल’ साहुजीं नोटया छगू क्याँथ खगेन्द्रया ल्हातय् तयाबिल । खगेन्द्रया ख्वालय् अल्याख लसतां भय्बिल । छगू लख दां, छक्वलं वं गुबलें मखंनि । थौं थःगु हे ल्हाती खनाच्वन । तर वयागु व लसता निभालं कःगु च्वापु थें याकनं नायावन । तनावन ।
जब साहुजीयागु लिपांगु वाक्यांश वयागु न्हाय्पनय् दुने न्हय्बि जुयाः दुहां वन । ‘थनिंनिसें छं थन ज्या नं यायेम्वाःल न्हां’ सकलें स्तब्ध जुल ।थःगु ज्यान बचय् यानाः बिउम्हेसित साहुजीं छाय् ज्यां लिकया छ्वयेत्यन मसिउ सुनानं । छाय् खगेन्द्रयात पितिना छ्वये त्यन ? अनपेक्षित लिच्वः जुयाबिल थ्व खगेन्द्रया निंतिं । वया ख्वख्वमख्व धाःगु सः पिज्वल, ‘साहुजी थ्व ला न्याय मजुल नि ।’
‘न्याय ला छं मयात का खगेन्द्र’ साहुजीया खँ न्यनाः खगेन्द्र जक मखु अन दुपिं सकलें वाताहां जुल । दावा छिरिङ्ग शेर्पां धयायन, ‘खः मखु छं हे धा रे । चान्हय् पिवाः च्वनेत छेँया रेखदेख यायेत चौकीदारीया भाला बियागु खः छंत । छं न्हाचः म्हगसय् हेलिकप्टर दुर्घटना जूगु खना धाल । धायेबलय् छ चान्हय् न्ह्यलं ब्वाःम्ह जुल । छंगु चौकीदारी नं द्यंगु सीदत । छं हे धा रे का । छं जक न्याय याना थें च्वं ला थःगु पेशाप्रति ?’
लिसः मवल । पाकां सुया बिउथें खगेन्द्रया म्हुतुसि त्याप्प प्यपुन ।
LEAVE YOUR COMMENTS