नेपाःयात १६९ या पौ ,सडक विस्तार पीडितया समस्या ज्यंकेत निर्देशन

येँ – देय्या थीथी थासय् जुयाच्वंगु सतक विस्तार सम्बन्धी मुद्दायात कयाः अन्तर्राष्ट्रिय श्रम संगठन (आईएलओ १६९) ज्याकूपाखें नेपाः सरकारयात पौ छ्वया हःगु दु ।सतक विस्तारं स्थानीय जनतायात विस्थापित यायेत्यंगु बारे नेपाल टेलिकमया ट्रेड युनियनं आईएलओ १६९ कार्यान्वयन जुइमाः तःगु मुद्दायात कयाः आईएलओं उगु पौ छ्वया हःगु खः ।

आईएलओया उगु पौ बारे जानकारी बिसें आदिवासी जनजाति सम्बन्धी कानुनी संस्था लाहुर्निपया सचिव एवं अधिवक्ता शंकर लिम्बुं उगु पती खुलाया दुने स्थानीय आदिवासी लिसे वार्ता यानाः समस्या समाधान या धकाः सरकारयात ‘निर्देशन’ बियातःगु खँ कनादिल ।
पती याकनं वार्ताया वातावरण दयेकेत निर्देशन बीगु लिसें स्थानीय आदिवासीया सहमति मदयेकं गुगुं नं कथंया पलाः ल्ह्वने मते धकाः नं धयातःगु खँ लिम्बुं नेपालभाषा टाइम्स यात कनादिल ।

तर सरकारलिसे वार्ता यायेगु सवालय् धाःसा सडक पीडिततय्सं स्वंगू शर्त न्ह्यःने तःगु खँ वय्कलं कनादीगु दु । सर्वोच्च अदालतं सडक पीडितया पक्षय् याःगु फैसला पुनरावेदन यायेमाः धकाः सरकारपाखें तयातःगु निवेदन लित कायेमाःगु शर्त सडक पीडित संघर्ष समितिं तःगु दु । लिसें अझ नं सरकारयात पत्याः यायेगु वातावरण तयार मजूगुलिं मध्यस्थता विश्वसनीय जुइमाः धइगु मेगु शर्त नं न्ह्यःने तःगु दु ।

अथे हे सर्वोच्च अदालतया निर्णय कथं तत्काल स्थानीय जनतायात क्षतिपूर्ति बीमाःगु व आः सदनय् हयेत्यंगु जग्गा अधिग्रहण सम्बन्धी विधेयक लित कायेमाःगु माग नं संघर्ष समितिं न्ह्यःने तःगु दु । यदि सरकार लिसे जुइगु वार्ता असफल जुल वा सरकार माने मजुल धाःसा छु जुइ धइगु न्ह्यसःया लिसलय् वय्कलं धयादिल, ‘सरकार जिम्मेवार जुइमाः ।

उकिया निंतिं हे आईएलओपाखें अन्तर्राष्ट्रिय मिडियर तयेमाःगु खः ।’वार्ता छगू पक्षपाखें जक मजुइगु जुयाः थुकी सरकार जिम्मेवारी व गम्भीरतापूर्वक न्ह्यायेमाःगु सुझाव नं वय्कलं बियादीगु दु ।

म्हिगः संघर्ष समितिया मुँज्या
आईएलओपाखें छ्वया हःगु पौयात कयाः म्हिगः उपत्यकाव्यापी सतक विस्तार पीडित संघर्ष समितिया ग्वसालय् छगू सहलह ज्याझ्वः जुल । सहलह लिपा थ्वहे वइगु शनिवाः यलया निगू थासय् सभा यायेगु खँ क्वःजिउगु दु । लिसें आः न्ह्याकेगु आन्दोलनया बारे सहलह जूगु खँ नं धाःगु दु । तर आः गज्याःगु कथंया आन्दोलन जुइ धइगु खँ धाःसा छन्हु निन्हुया दुने सार्वजनिक जुइगु खँ सहलहय् दुथ्याःम्ह पत्रकार श्रीकृष्ण महर्जनं ‘नेपालभाषा टाइम्स’ यात कनादीगु दु ।