५२ म्ह ट्याक्सी चालकतय्त कारवाही

येँ – महानगरीय ट्राफिक प्रहरी महाशाखां यात्रुयात ठगे याःगु द्वपनय् ५२ म्ह ट्याक्सी चालकतय्त कारवाही याःगु दु । तोके यानातःगु स्वयां अप्वः ध्यबा काइपिं, मिटरं वने माने मजूइपिं, मिटर स्यंकातःपिं व धाःगु थासय् वनेत माने मजुइपिं ट्याक्सी चालकतय्त महाशाखां कारवाही याःगु खः । महाशाखाया वरिष्ठ उपरीक्षक वसन्तकुमार पन्तं ट्याक्सीतय्सं यात्रुतय्त ठगे याःगु यक्व गुनासो वयेवं कारवाही अभियान न्ह्याकागु खँ धयादीगु दु ।

महाशाखां थौंकन्हय् ट्याक्सीया जाँचया निंतिं ४० निसें ५० म्ह ट्राफिक सादा वसतय् न्हियान्हिथं खटे यानातःगु दु । यात्रु ठगे याःपिं ट्याक्सीतय्त स्वद्वः तका तक जरिवाना यायेगु खँ पन्तं धयादीगु दु ।

महाशाखाया कथं फुक्कं ट्याक्सीचालकतय्सं ठगे मयाःसां अप्वः थें ट्याक्सी चालकतय्सं ठगे यायेगु यानाच्वंगु दु । अप्वः धयाथें थबही, टिचिङ्ग अस्पताल, माछापोखरी, कलंकी, कोटेश्वर, एयरपोर्ट लागाय् ठगी जुइगु जुयाच्वंगु दु । चालु आर्थिक दँय् जक महाशाखां थथे ठगे याइपिं खुद्वलं मल्याक ट्याक्सीचालकत्त कारवाही यायेधुंकूगु दु ।