येँ मनपा १ वडाय् स्वास्थ्य शिविर

येँ – येँ महानगरपालिका वडा नं. १ य् जूगु स्वास्थ्य शिविरय् न्यासः स्वयां अप्वःसिनं थःगु स्वास्थ्य परीक्षण याकूगु दु । येँ महानगरपालिकाया उपप्रमुख हरिप्रभा खड्गी श्रेष्ठं उलेज्या यानादीगु उगु स्वास्थ्य शिविर येँ मनपा वडा नं. १ व थीथी सामाजिक संस्थाया ग्वसालय् नक्सालय् जूगु खः ।

शिविरया उलेज्या यासें येँ मनपा उपप्रमुख श्रेष्ठं महानगरपालिका लागा दुनेया निजी अस्पतालय् गरिब, असहाय व विपन्न वर्गया निंतिं निःशुल्कप उपचारलिसें सहुलियत उपलब्ध याकेगु निंतिं गृहकार्य जुयाच्वंगु धयादिल । वडा नं. १ या वडाअध्यक्ष भरतलाल श्रेष्ठं वडा दुनेया भौतिक पूर्वाधार निर्माणलिसें स्थानीय देगः, सतः, फल्चा लगायतया सम्पदा संरक्षण व स्थानीय विकासया निंतिं थः प्रतिवद्ध दुगु धयादिल ।

स्वास्थ्य शिविरय् बिपि कोइराला लायन्स अध्ययन केन्द्र, ग्रान्डी अन्तर्राष्ट्रिय अस्पताल, फेमिलि डेन्टल सोलुसनया स्वास्थ्य संस्थाया चिकित्सकतय्सं मिखा, वा व सामान्य परीक्षण लगायतया सेवा बियादीगु खः ।

ज्याझ्वलय् ग्रान्डी अस्पतालया वरिष्ठ चिकित्सक डा. विपिन नेपाल, बिपी कोइराला लायन्स अध्ययन केन्द्रया रवीकुमार पौडेल, नेपाल उद्यमशील महिला संघया अध्यक्ष रम्भा श्रेष्ठ, स्वास्थ्य शिविरया संयोजक राज्यलक्ष्मी शाक्य लगायतं थीथी कारणं अप्वया वनाच्वंगु स्वास्थ्य समस्याया बारे जानकारी बियादीगु खः ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन