ने. सं. ११४४ कछलागा पञ्चमी -

सुहानाया डेब्यु तयारी

बलिउडया नांजाःम्ह व सफल निर्देशक मध्ये छम्ह करण जोहरं थःगु न्हूगु संकिपापाखें ‘किंग खान’ अर्थात शाहरूख खानया म्ह्याय् सुहाना खानयात ‘डेब्यू’ यायेगु तयारी यानाच्वंगु दु । निर्देशक जोहरं शाहरूखया म्ह्याय्यात थःगु फिल्मपाखें ‘लन्च’ यायेगु तयारी यानाच्वंगु खः ।
यद्यपि सुहानां फिल्मय् डेब्यू याये न्ह्यः हे छगू म्यागेजिनया निंतिं न्हापांगु ‘बोल्ड फोटोशुट’ यानाः ‘कभर गर्ल’या रुपय् धाःसा डेब्यू यायेधुंकूगु दु । उगु म्यागेजिनया विशेष अंकया सार्वजनिक शाहरूखं हे याःगु खः । शाखरुखं म्यागेजिनया कभर पेजय् पिहां वःगु थः म्ह्याय्या न्हापांगु फोटोयात सामाजिक संजाल ‘ट्विटर’ नं सेयर याःगु दुसा उकी च्वयातःगु दु, ‘सुभाय् भोग ।’

उलि जक मखु, शाहरूखया जहान व सुहानाया मां गौरी खानं नं थः म्ह्याय्यात फोटोशुटया किपा व भिडियो सेयर यासें गाक्कं तारिफ नं याःगु दुसा छगू उत्कृष्ट फोटोशुट धासें म्यागेजिनयात सुभाय् नं देछाःगु दु ।

थ्व स्वयां छुं ई न्ह्यः सुहानाया फोटोशुटया बारे मां गौरी खानं छगू ज्याझ्वलय् धाःगु खः, ‘सुहाना थौंकन्हय् म्यागेजिनया निंतिं फोटोशुटय् व्यस्त जुयाच्वंगु दु, थ्व सम्बन्धय अप्वः नमवाये ।’

शाहरूख थः म्ह्याय् उत्कृष्ट डान्सर जुइमा धइगु इच्छा यानाच्वंगु दुसा सुहाना धाःसा थः अबु थें हे अभिनयया क्षेत्रय् स्थापित जुइगु इच्छा यानाच्वंगु दु ।