न्यूरोडयात नमूना व्यापार केन्द्र दयेकेमाः

येँ – उद्योग, वाणिज्य तथा आपूर्तिमन्त्री मातृकाप्रसाद यादवं येँया न्यूरोड लागायात नमूना व्यापारिक केन्द्र कथं विकास यायेमाःगु खँ धयादीगु दु । खिचापुखू न्यूरोड व्यापार संघया खुक्वःगु अधिवेशन व झिंछक्वःगु साधारण सभाय् न्ववानादिसें मन्त्री यादवं समृद्ध नेपाः दयेकेगु निंतिं न्यूरोडया व्यवसायीतय् नं तःधंगु भूमिका दइ धासें न्यूरोड देय्या हे सम्पत्ति जूगुलिं थुकिया रक्षा यायेत उद्यमी व्यवसायीत लगे जुइमाः धयादीगु खः ।

ज्याझ्वलय् न्ववानादिसें येँ मनपाया मेयर विद्यासुन्दर शाक्यं न्यूरोड ऐतिहासिक व्यापारिक स्थल जूगुलिं थुगु क्षेत्रया विकासया निंतिं महानगरपालिकां योजना दयेकाः न्ह्याः वनी धयादिल । थ्व झ्वलय् वय्कलं न्यूरोड व दरवार मार्ग क्षेत्रय् स्मार्ट पार्किङ्ग तयेगु निंतिं बोलपत्र आह्वान जुइधुंकूगु जानकारी नं बियादिल ।

खिचापोखरी युवा क्लबया अध्यक्ष राजेश डंगोलं धरहरा पुनर्निर्माण व पार्किङ्गया कारणं खिचापुखू क्षेत्रया व्यवसायय् हे समस्याय् लानाच्वंगु खँ कनादिल । ज्याझ्वलय् नेपाल राष्ट्रिय फुटबलया मू प्रशिक्षक बालगोपाल महर्जनयात हनेगु ज्या नं याःगु खः ।