पावर न्यूज म्युजिक अवार्ड सम्पन्न

येँ – नेशनल पावर न्यूज म्युजिक अवार्डया निगूगु संस्करणया ज्याझ्वः वंगु विहीवाः तःजिक क्वचाल । ‘नेशनल पावर न्यूज म्युजिक अवार्ड–२०१९’या नामं जूगु ज्याझ्वलय् नेपाःया सांगीतक ख्यलय् न्हापांखुसी समावेशी रुपं सिरपाः लःल्हायेगु ज्या जूगु खः । संघीय लोकतान्त्रिक गणतन्त्र नेपाःया न्हापांम्ह उपराष्ट्रपति परमानन्द झाया प्रमुख आतिथ्यताय् थनया राष्ट्रिय नाचघरय् उगु अवार्ड ज्याझ्वः जूगु खः ।

ज्याझ्वलय् नेपालभाषालिसें तामांग, राई लगायत नेपाःया थीथी भाय्या संगीतकःमिपिंत अवार्ड लःल्हाःगु खः । सांगीतिक ख्यःया थीथी ५१ गू विधाय् धेंधेंबल्लाःया लिधंसाय् अवार्ड लःल्हाःगु ज्याझ्वलय् नेपाःया संगीत व कला ख्यलय् विशिष्ट योगदान बियादीपिं थीथी व्यक्तित्वपिंत नं विशेष सम्मान याःगु खः ।

ज्याझ्वलय् मूपाहां पुलांम्ह उपराष्ट्रपति झानं नेपालभाषा सांगीतिक ख्यलय् म्युजिक भिडियोया न्हापांम्ह निर्देशककथं नांजाःम्ह सिने पत्रकारलिसें संचारकःमि विजयरत्न असंबरेयात ‘नेशनल पावर न्युज कला सम्मान–२०१९’ लःल्हानादीगु खः । अथे हे उगु अवार्ड ज्याझ्वलय् पत्रकार तुलसी गिरी‘भावुक’, पारस पौडेल व काव्या आचार्ययात नेशनल पावर न्युज पत्रकारिता सिरपाः लःल्हाःगु खः ।

अवार्ड ज्याझ्वलय् नेपालभाषा संगीत ख्यःपाखे ‘छुं छुं म्हगस’ म्येँया निंतिं नांजाःम्ह म्येँ हालामि सानुबाबु महर्जनयात उत्कुष्ट म्येँया अवार्ड लःल्हाःगु खःसा उत्कृष्ट म्युजिक भिडियोया अवार्ड ‘हिसि दुगु छंगु ख्वाः’ व उत्कृष्ट मोडलया निंतिं ‘नापलाः वये न्ह्यः मंगलय्’ म्येँया निंतिं रुपेन्द्र श्रेष्ठ ‘थक्वाः’ नं ल्हातय् लाकेत सफल जुल ।

अथे हे सोनी राजभण्डारीं लोकंह्वाःम्ह म्येँ हालामिया रुपय् ‘पपुलर सिंगर’ अवार्ड ल्हातय् लाकेत सफल जुयादिल । पावर इन्टरनेशनल मिडियाया ग्वसालय् जूगु ज्याझ्वलय् ग्वसाः खलःया कजि माधवराज खरेलं सांगीतिक ख्यःया सिरपाःया ख्यलय् थ्व छगू बिस्कंकथंया महत्वं जाःगु अवार्ड ज्याझ्वः जूगु धासें थुकियात अझ विशेषकथं विकास याना यंकेगु ग्वसाः दुगु जानकारी बियादिल ।

सम्बन्धित बुखँ

LEAVE YOUR COMMENTS