विद्युतीय गाडी वल चार्जिङ स्टेशन मवल

येँ – स्वनिगलय् न्यादँया दुने २० प्रतिशत विद्युतीय सवारी साधन चले यायेगु धाःसां नं सरकारपाखें माक्व ग्वाहालि मजूगु द्वपं सम्बन्धित उद्यमीतय्सं बिउगु दु । सरकारं थःपिनिगु घोषणापौ कथं विद्युतीय गाडी झिके यायेत भन्सार सुविधा बिउसां विद्युतीय गाडी चार्ज यायेगु निंतिं माःगु उपकरणय् धाःसा भन्सार सुविधा मबिउगु खँ धाःगु दु ।

स्वनिगलय्् झिंस्वम्ह उद्यमीतय्सं स्वनिगलय् ४० सिट क्षमताया आधुनिक विद्युतीय बस चले यायेगु तयारी यानाच्वंगु निकाय सुन्दर यातायात प्रालियात चार्जिङ स्टेशनया निंतिं माःगु सामानय् भन्सार छुट मबिउगु खँ धाःगु दु । छकः चार्ज यायेबलय् २६८ किलोमिटर चले जुइगु बस कम्पनीं नेपाः हयेधुंकूगु दु । कम्पनीं आःयात स्वंगः बस चक्रपथय् चले यायेगु कथं तयारी यानाच्वंगु दु ।

कम्पनीं नेपालय् निजी क्षेत्रं न्हापांखुसी विद्युतीय बस चले यायेत्यंगु खःसां सरकारपाखें माक्व ग्वाहालि मदुगु गुनासो प्वंकूगु दु । थःपिंसं सरकारयात चार्जिङ स्टेशनया निंतिं माःगु सामानय् भन्सार छुट बीत आनाकानी यानाच्वंगु द्वपं सञ्चालनतय्सं बिउगु दु । सञ्चालकतय्सं विद्युतीय सवारी साधनया प्रवद्र्धनया निंतिं भौतिक पूर्वाधार तथा यातायात मन्त्री रघुवीर महासेठं ग्वाहालि मयानाच्वंगु द्वपं नं बिउगु दु ।

कम्पनीया कथं चार्जिङ स्टेशनया निंतिं माःगु उपकरणय् भन्सार छुट बीत भन्सार विभाग तयार दु, अथेहे यातायात व्यवस्था विभाग नं पौ च्वयेत तयार दु, तर मन्त्री थःहे भन्सार छुट बीत तयार मदुगु द्वपं कम्पनीं बिउगु दु । कम्पनीं विद्युतीय बस चले यायेत चार्जिङ स्टेशनयात माःगु सामान नं हयेधुंकूगु दु । कम्पनीया कथं आः नेपालय् हःगु छगः विद्युतीय बसया मू १ करोड ८७ लाख तका तू । कम्पनीं याकनं हे झिगः न्हूगु बस हयेगु तयारी यानाच्वंगु दु ।

 

सम्बन्धित बुखँ

LEAVE YOUR COMMENTS