धः जाम जुयाः बागबजाः डुबानय्

येँ -थनया बागबजारय् धः जाम जुयाः स्थानीय जनतायात समस्या जूगु दु । जमः असं निसें वइगु धः जाम जुयाः बागबजाः पूवंक हे डुबानय् लानाच्वंगु दु । वंगु छवाः न्ह्यवंनिसें थ्व समस्या जुयाच्वंगु खँ २८ वडाया अध्यक्ष भाइराम खड्गी ‘नेपालभाषा टाइम्स’ यात कनादिल । धः जाम जुयाः छेँय् छेँय् हेधःया फोहोर लः दुहां वनाच्वंगु दु । थुकिं यानाः दुर्गन्ध अप्वःगु दु ।

वडाध्यक्ष खड्गीया कथं अन च्वंगु मंगाः पूवंक हे जाम जूगुलिं धःया लः सतकय् वःगु खः । आः न्हूगु मंगाः दयेकाः पाइप हे हिलेगु ज्या जुयाच्वंगु दु । थौं माघी जूगुलिं ज्या याइपिं थारुत नखः माने यायेत वंगुलिं धः दयेकेगु ज्या लिबानाच्वंगु दु । समस्या ज्यंकेत थम्हं कुतः यानाच्वनागु जानकारी बियादिसें वय्कलं ज्या याइपिं मदयाः समस्या जुयाच्वंगु खँ कनादिल । धः दयेकेगु निंतिं माक्व ध्यबा दुसां नं ज्या यायेमफयाः थः निरीह जुयाच्वनागु खँ नं वय्कलं कनादिल ।

धःया निकास यायेगु निंतिं थीथी थासय् गाः म्हुयातःगुलिं बागबजाःया दुनेया बस्ती पूवंक हे धःया डुबानय् लानाच्वंगु दु ।

नेपालभाषा टाइम्स

च्वमिया मेमेगु

• अमेरिकां लित बिल खुया यंकूगु निगू मूर्ति
• नेवाः हाइकु ख्यः न्हय्‌क्वःगु बुसादँ हना
• महाकवि सिद्धिदासया बुन्हिया लसताय् चिनाखँ व किपा च्वज्या कासा
• एनओएया रजत जयन्ती व न्हूधाः
• सामाजिक संजालं लुइकल स्वंगू दशक न्ह्यः तंगु मूर्ति