गौतम बुद्ध विमानस्थल दयेकेगु ज्या तीव्र

येँ – निगूगु अन्तर्राष्ट्रिय विमानस्थल गौतम बुद्ध विमानस्थल दयेकेगु ज्या तीव्र गतिं न्ह्याःगु दु । नेपाल भ्रमण दँ २०२० यात लक्षित यानाः तीव्र गतिं ज्या न्ह्याकाच्वंगु खः । थौंकन्हय् हवाई पूर्वाधार व जमिनया पूर्वाधार दयेकेगु ज्या धमाधम जुयाच्वंगु दु । पूर्वाधारया १२ विधाय् ६० प्रतिशत ज्या क्वचाःगु खँ नागरिक उड्डयन प्राधिकरणं धाःगु दु ।

थौंकन्हय् विमानस्थल दयेकेत नीप्यघौं ज्या जुयाच्वंगु दु । कार्तिक १५ गते निसें धावनमार्ग दयेकेगु ज्या न्ह्याःगु खःसा वइगु खुलाया दुने क्वचाइगु खँ प्राधिकरणं धाःगु दु । थौंकन्हय् विमानस्थलया ३ हजार मिटर ताःहाकःगु व ४५ मिटर तक्याःगु रनवे, ट्याक्सी वे, घाङग्रा खोल, सहायक रोड, टर्मिनल बिल्डिङ, प्यासेन्जर बिल्डिङ, कन्ट्रोल टावर, एयर कार्गो, सबस्टेशन बिल्डिङ दयेकेगु ज्या जुयाच्वंगु दु ।

आयोजनया निंतिं चालू आर्थिक दँया निंतिं ६ अर्ब ८३ करोड बजेट विनियोजन यानातःगु दु । न्यालाया दुने थुुगु आयोजनाय् ६ अर्ब ८३ करोड तका बजेट विनियोजना यानातःगु दु । न्यालाया दुने आयोजनाया ३ अर्ब ३९ करोड तका खर्च जुइधुंकूगु दु । विमानस्थलया टेक्निकलपाखेया टेन्डरया ज्या लिपांगु चरणय् थ्यंगु खँ प्राधिकरणं धाःगु दु ।

टेक्निकल ज्या पाखे भ्वाइस कम्युनिकेट्रि कन्ट्रोल प्रणाली, एटीएम कम्युनिकेशन, मेटोरोलोजिकल इक्युप्मेन्टस, एटीएम कक्सोलेस, इस्टुमेन्ट ल्याण्डिङ सिस्टम लगायत ज्याया निंतिं टेन्डरया ज्या लिपांगु चरणय् थ्यंगु दु । थुकिया निंतिं एडीबीया प्रतिनिधि दुथ्याःगु पुचलं छुं न्हिया दुने हे कम्पनी छनोट याइगु खँ प्राधिकरणं धाःगु दु