युरिन इन्फेक्सनय् छु नयेगु, छु मनयेगु?

युरिन ट्रायक्ट इन्फेक्सन (यूटिआई) अर्थात युरिन इन्फेक्सन, (च्व फायेबलय् हिइसे च्वनीगु व स्याइगु) व किड्नी सम्बन्धी अनेतने ल्वय्या कारणं च्व फायेबलय् हिइसे च्वनीगु जुइ । उघरिमय् उपचार मयात धाःसा तसकं सास्ति जुइ ।

कारण : युरिन इन्फेक्सन जुइगु थीथी कारण मध्ये मुख्य रूपं भिरंगी, च्वप्वःचा हिइसे च्वनीगु, च्व-नलि मनावइगु, डायबिटिज, च्वप्वःचाय् पथरी थाइगु, च्वप्वःचाय् टिबी ल्वचं यानाः ग्लाय्ण्ड वइगु, तांन्वइगु मौसमय् लः मत्वनीगु, च्व फिनाच्वनेगु आदि जुइ ।

लक्षण : दिनाः दिनाः तुलुतुलु जक च्व वइगु, म्हासुक च्व वइगु, च्व फायेबलय् हिइसे च्वनीगु आदि ।

छु नयेगु?

दकलय् न्हापां ला फक्व अप्वः लः त्वनेगु यायेमाः । थुकिं इन्फेक्सन जुइकीगु ब्याक्टेरियायात च्वलिसें म्हं पितछ्वयेत ग्वाहालि याइ ।
खरबुजा, स्याउ, अनार, सन्तरासि, मुसुम, अम्बः आदि रसदार व ठण्डी याइगु फलफुल भपियादिसँ ।
कचिगु दुरुया लस्सीइ सुकुमेलया चुं ल्वाकछ्यानाः सुथय् बहनी त्वनादिसँ ।
गाजर, तुया जूस, कचिगु नैंक्याःया लः, महि त्वनेगु यानादिसँ ।
लुमुलुमु धाःगु लः त्वनेगु यानादिसँ । प्याःचाइबलय् कागति लः त्वनादिसँ ।
तरकारीइ बन्दा, रामतोरिया, प्याज, धन्या भपियादिसँ ।
छगू कप लैंया जूस सुथय् बहनी त्वनादिसँ ।
धलिइ प्रोबायोटिक दइ, थ्व छताजि भिंकीगु ब्याक्टेरिया खः । प्रोबायोटिकं म्हय् इन्फेक्सनयात पनी । अथे जूगुलिं युरिन इन्फेक्सन जुइबलय् धौ न्हिं न्हिं भपियादिसँ, लिसें लछि तक न्हिं न्हिं प्रोबायोटिक सप्लिमेन्ट नं काल धाःसा इन्फेक्सन सुचुक हे लनी ।
लाभा व प्याज निताय्सनं ब्याक्टेरियालिसे ल्वायेगु प्रवृत्ति दइ । थुपिं नितां नं म्हय् गनं नं उत्पन्न जुइपिं मभिंपिं ब्याक्टेरिया व मेमेपिं सूक्ष्म किटाणुतय्त स्यायेगु ज्या याइ । अथे जूगुलिं युरिन इन्फेक्सन जुइबलय् थुपिं नितां फक्व अप्वः नयेगु यायेमाः ।
लाभा गज्जबया एन्टि अक्सिडेन्ट व एन्टि बायोटिक पदार्थ खः । लाभाया एन्टि अक्सिडेन्टं ल्वय्लिसे ल्वायेगु क्षमता अप्वयेकी । लाभाय् एन्टि फंगस गुण नं दु, गुकिं ल्हाः तुतिइ फंगस इन्फेक्सन मजुइकाबी ।
भिटामिन सी झीगु च्वप्वःचा व च्व-नलि स्वस्थ यानातयेगु व उकिया ज्या यायेगु पहः बांलाकातयेत ग्वाहालि यानाच्वनी । भिटामिन सीं च्वयात अप्वः अम्लीय (एन्टि एसीडिक) दयेकी, गुकिं यानाः इन्फेक्सन उत्पन्न याइपिं ब्याक्टेरिया ब्वलने फइमखु। भिटामिन सीया थुगु विशेषता म्हसी धुंसेंलि युरिन इन्फेक्सनय् खरबुजा, ग्वारामल्ता आदि भिटामिन सी यक्व दुगु पदार्थ सेवन यायेमाः ।

खास खँ : अम्ल यक्व हे अप्वः जुलकि च्वप्वःचाय् समस्या तच्वयेफु । अथे जुयाः झीसं फलफुलया मामिलाय् फल हे ग्वलं मनसे उकिया जूस जक त्वनेगु यायेमाः ।

उपाय १ : बागू कप अंगूरया रस थ्यंमथ्यं छवाःतक त्वन धाःसा च्व बांलाक वइ । लिसें तःक्वः तःक्व च्व फायेमालाच्वनी नं मखु ।

उपाय २ : छवाः तक न्हिं न्हिं सुथय् छगू कप लखय् अम्बःया रस ल्वाकछ्यानाः त्वनाबिल धाःसा च्व फाये थाकुइ मखु ।

उपाय ३ : अम्बःया रसय् हलू व कस्ति ल्वाकछ्यानाः न्हिं न्हिं सेवन यात धाःसा युरिन इन्फेक्सन मजुयावनी ।

उपाय ४ : न्हिं न्हिं पासिया रस त्वनाच्वन धाःसां नं थ्व समस्या ज्यनी ।

उपाय ५ : अम्बःया २०० ग्राम रसय् मलय्चुं भचा व हलू भचा ल्वाकछ्यानाः न्हिं न्हिं त्वनादिसँ ।

भुइँकटहर भपियादिसँ । उकी ब्रोमेलेन नांगु तत्व दु, गुगु तःता हे एन्जाइमया मिश्रण खः । थुकिया विशेषता थ्व खःकि थ्वं इन्फेक्सनया झ्वलय् हिइया वइगुयाः कम
याइ । थुगु तत्वय् ब्याक्टेरिया व भाइरसयात स्यायेगु क्षमता दु ।
युरिन इन्फेक्सनया समस्या जुइबलय् गुलिं गुलिं विशेषज्ञतय्सं छगू गिलास लखय् बागू चम्चा बेकिंग सोरा तयाः त्वनेगु सल्हा बी । थुकिं युरिन इन्फेक्सन जुइबलय् स्याइगु व हिइसे च्वनीगु लनावनी ।
लौका भपियादिसँ । लौकाय् प्रोटीन, कार्बोहाइड्रेट, फाइबर व मिनरल यक्व दु । थुकिं पित्तयात पितछ्वइ । थुकिं किडनी व च्व सम्बन्धी थीथी ल्वय् लंकी ।
बहनी छगू गिलास लखय् न्यागू खुगू चम्चा सोंप फ्वयादिसँ । सुथय् सोंप छानय् यानाः लः जक त्वनादिसँ ।
वाउँगु धन्न्याया हःया रस पिकयाः चिनि भतिचा तयाः न्हिं न्हिं त्वनादिसँ ।
जा नयेबलय् नवःघाँय्या अचार भपियादिसँ ।
अनारया ख्वला गंक पानाः नचुक निनादिसँ अले न्हिं छगू चम्चाया मात्राय् लःलिसे सेवन यानादिसँ ।
न्हिं न्हिं सुथय् मिचःया निगू चम्चा रस पिकयादिसँ, अले झिन्हु तक सेवन यानादिसँ ।
झिन्हु झिंन्यान्हु तक कचिगु इमू व साखः ल्वाकछ्यानाः सेवन यानादिसँ ।
छुं न्हि तक न्हिं न्हिं केराया निगू चम्चा रस पिकयादिसँ, अले उकी चि भचा तयाः त्वनादिसँ ।
छुं न्हि तक बन्दा चि-मसला छुं मतसे घ्यलय् सियाः भपादिसँ ।
चिकुलाया मौसम खःसा न्हिं २५० ग्राम गाजरया रस त्वनादिसँ ।

छु मनयेगु?

अज्याःगु पदार्थ गुकी चिनि तयाः दयेकातःगु खः, युरिन इन्फेक्सन जुयाच्वंबलय् भपादीमते । छाय्कि चाकुगु पदार्थं च्व-नलिइ ब्याक्टेरिया उत्पादन यायेगु ज्या याइ । अथे जुयाः थ्व इलय् केक, कुकीज, कार्बोनेटेड ड्रिंक व मेमेगु चिनिं दयेकातःगु पदार्थ नये हे मजिउ ।
कफि त्वनेगु त्वःतादिसँ । कफिइ दुगु क्याफिनं च्वप्वःचायात दुःख बीगु ज्या याइ, अर्थात युरिन इन्फेक्सनया इलय् कफि त्वनकि समस्या झन् चर्को जुइ । थुकिया
थासय् हर्बल टी त्वनादिसँ ।
अय्लाः न्ह्यागु हे कथंया जूसां उकिं च्वप्वःचित बैचेन यानाबी । अथे जूगुलिं युरिन इन्फेक्सन जुइबलय् अय्लाः त्वन धाःसां नं समस्या झन् चर्को जुइ ।
पाउँ पालु व मसला यक्व दुगु नसाज्वलनं युरिन इन्फेक्सनयात झन् तच्वयेकाबी । थुकिं स्याइगु व हिइसे च्वनीगु अप्वयेकाबी । उकिं थज्याःगु नसाज्वलं नयेमजिउ ।

अले थ्व नं