निगमया वाइड बडी मोहनि लिपा न्हूगु गन्तव्यय् ब्वइगु

येँ – नेपाल वायुसेवा निगमं आः हःगु निगः तग्वःगु विमानं मोहनि लिपा निसें न्हूगु गन्तव्यय् उडान याइगु जूगु दु । निगमया कथं मोहनि लिपा थ्व निगलं विमान दक्षिण कोरिया, जापान व साउदी अरेबियाय् ब्वयेगु सुरु याइ । थ्व स्वंगुलिं देशं निगमयात थःपिनिगु देशय् अवतरण यायेगु निंतिं स्वीकृति बीधुंकूगु दु ।

युरोपेली संघं नेपाःया विमान सेवायात हाकुगु धलखय् तयातःगुलिं आःयात थुपिं एशियाली देशय् निं ब्वयेकेत्यंगु खः । विमान नेपाः थ्यंगु निला लिपा बाइड बडी विमान न्हूगु गन्तव्यय् वनेत्यंगु खः । आः थ्व विमानं नेपाल वायु सेवा निगमं ब्वयेकाच्वंगु पुलांगु गन्तव्यय् हे उडान यानाच्वनीगु खँ धाःगु दु ।

दक्षिण कोरिया, जापान व सउदी अरेबियाया उड्डयन प्राधिकरणं नेपाःया विमानयात अवतरण याकेगु निंतिं स्वीकृति बिइधुंकाः आः उडान अनुमति बीगु निंतिं नेपाली विमान व विमानस्थलया सुरक्षा बारे बुझे यायेत थ्व स्वंगुलिं देय्या प्रतिनिधि वइगु महिनाय् नेपाः वयेत्यंगु खँ निगमया महाप्रबन्धक सुगतरत्न कंसाकारं बिबिसीयात धयादीगु दु ।

वय्कःया कथं थुपिं स्वंगुलिं देय्या प्रतिनिधिपिंसं निगम जक मखु नागरिक उड्डयन प्राधिकरणय् दुगु सुविधा व भौतिक पूर्वाधारया नं जाँच याइ । उमिसं बिउगु प्रतिवेदनया आधारय् नेपाःयात उडान अनुमति बीगु खँ वय्कलं धयादीगु दु ।सम्बन्धित देय्या उड्डयन संस्थां अनुमति मबीकं उगु देशय् जहाज ब्वयेके दइमखु ।

मेखे वंगु प्यदँ न्ह्यवनिसें नेपाःया उड्डयन क्षेत्रयात युरोपेली संघं हाकुगु धलखय् तयातःगुलिं थुपिं देशं नं अनुमति मबीगु खँ उड्डयन विज्ञतय्सं धयाच्वंगु दु । तर महाप्रबन्धक कंसाकारं युरोपेली संघया हाकुगु धलखय् लाःसां आः थःपिं वनेत्यनागु गन्तव्यय् उडानया निंतिं छुं लिच्वः मलाइगु खँ धयादीगु दु ।

लिसें वय्कलं युरोपेली संघया छपुचः नं हाकनं नेपाः वयेत्यंगु धासें थ्व पालय् नेपाःयात हाकुगु धलखं चिइकीगु विश्वास प्वंकादीगु दु ।
थ्यंमथ्यं २४ अर्ब तका पुलां निगमं निगः वाइडबडी विमान न्यानाहःगु खः ।

थ्व विमान दकलय् न्हापां अनुमति दुगु देशय् नं ब्वयेकाः अनुभव कायेमाःगु अन्तर्राष्ट्रिय अभ्यासया कारणं न्हूगु गन्तव्यय् तुरुन्त ब्वयेके मिले मजूगु खँ निगमं धाःगु दु । निगमं अमेरिका, अष्ट्रेलिया, दक्षिण कोरिया व युरोपेली देशयात हे लक्ष्य यानाः थःपिनि सेवा विस्तार यायेगु लक्ष्य तयातःगु दु ।