नेपाःया यु –१९ मिसा टिम बंगलादेश वन

येँ- बंगलादेशया ढाकाय् जुइगु यु –१९ मिसा साफ च्याम्पियनसिप फुटबलया निगूगु संस्करण म्हितेत नेपाःया यु–१९ राष्ट्रिय महिला टिम मंगलवाः बंगलादेश वंगु दु । टिमयात सोमवाः एन्फां बिदाइ बिउगु खः ।

यु –१९ मिस्तय् साफ च्याम्पियनसिपय् थुगुसी न्यागू टिमं ब्वति काःगु दु । बंगलादेशया ढाकाय् डिसेम्बर ११ तारिख निसें २२ तारिख तक जुइगु च्याम्पियनसिपय् नेपाःलिसें ग्वसाः देय् बंगलादेश, भारत, भुटान व श्रीलंकां ब्वति काःगु दु । कासा राउण्ड रोबिनया आधारय् जुइसा शीर्ष निगू टिमया दथुइ फाइनल कासा जुइ ।

नेपालं न्हापांगु कासा ११ तारिखय् बंगलादेशलिसे, १५ तारिखय् श्रीलंकालिसे, १७ तारिखय् भुटानलिसे व १९ तारिखय् भारतलिसे म्हितीगु जुइ । टिमया मुख्य प्रशिक्षक हरिओम श्रेष्ठ व टिमया कप्तान अन्जना राना मगर खः । प्रशिक्षक व कप्तान निम्हेसिनं नं उपाधि त्याकेगु लक्ष्य दुगु धाःगु दु ।

सन् २०१८ जूगु न्हापांगु संस्करणय् नेपाः उपविजेता जूगु खः । स्वदँ न्ह्यः जूगु फाइनलय् नेपाः बंगलादेशपाखें बूगु खः ।