छितः नं साइबर ठगया फोन वल कि ?

येँ – लकडाउनया ई दु । मनूतय् ज्या मदु । थज्याःगु हे इलय् अपराधवृत्तिया मनूतय्सं अनलाइन माध्यमपाखें मनूतय्त स्वापू तयाः खँल्हाबल्हा यायेगु व वयां लिपा वहे खँल्हाबल्हाया माध्यमं ब्ल्याक मेल यायेगु ज्या यानाच्वंगु सुचंत वःगु दु । थौंकन्हय् थःपिंत उकथं फँसे यानाच्वन धइगु खँयात कयाः येँया प्रहरीया साइबर ब्युरोय् आपालं रिपोर्टत वयाच्वंगु खँ धाःगु दु ।

साइबर ब्युरों बिउगु जानकारी कथं थौंकन्हय् अज्याःपिं साइबर ठगतय्सं न्हापां थीथी मनूतय्त फोन यानाः खँल्हाबल्हा याइगु लिपा खँ ल्हाहां हे उमित उक्से यानाः म्हुतु ल्हाकेगु तकया अवस्था हयेगु यानाच्वंगु दु । तर उमिसं अज्याःगु खँल्हाबल्हायात रेकर्ड यानातःगु दइ । फोनय् छिं अज्याःगु छुं म्हुतु ल्हाःगु वा सुयां विरुद्ध अश्लील खँ ल्हाःगु जुल धाःसा उमिसं वहे रेकर्डया कुचायात इन्टरनेटय् तया बी धकाः ब्ल्याक मेल शुरु याना हइ ।

खास यानाः समाजया प्रतिष्ठित मनूत व मिसापिंत उमिसं निशाना दयेकाः थज्याःगु ठगी ज्या यानाच्वंगु खँ नं ब्युरों धाःगु दु । उमिगु चंगुलय् लानाः फँसे जूपिं आपालं मनूतय्सं ब्युरोय् रिपोर्ट तःवःगु खःसा गुलिस्यां रिपोर्ट मतःपिं नं दु ।

थौंकन्हय् अज्याःपिं ठगत यक्व सक्रिय जुयाच्वंगु कारणं सुं म्हमसिउपिं मनूतय्सं छितः फोन यानाः अथे उक्से यायेगु कथंया संवाद न्ह्याकल धाःसा उकी ब्वति मकायेत वा उत्तेजित जुयाः लाक्वपाक्व मधायेत प्रहरीं इनाप याःगु दु । नापं अज्याःगु फोन नम्बर प्रहरीयात बियाः प्रहरीया ग्वाहालि यायेत नं इनाप याःगु दु ।

सम्बन्धित बुखँ

LEAVE YOUR COMMENTS