सांसद–नेतातय्त होटल निषेध

येँ (नेपालभाषा टाइम्स)- प्रदेश १ यात ‘कोशी प्रदेश’ नां तःगु प्रति असन्तुष्टि प्वंकाः आन्दोलन याना वयाच्वंगु संयुक्त संघर्ष समितिं थप आन्दोलनया ज्याझ्वः घोषणा याःगु दु । म्हिगः येँय् छगू पत्रकार सम्मेलन यासें घोषणा याःगु न्हूगु ज्याझ्वः कथं प्रदेश १ या ८२ म्ह सांसद व उमि शीर्ष नेतातय्त बहिष्कार याइगु जूगु दु ।

वैशाख २८ गते निसें प्रदेशसभाया नां ‘कोशी’ तयेगु पक्षय् मतदान याःपिं सांसद व उमि शीर्ष नेतायात बहिष्कार यायेगु घोषणा याःगु खः । ज्याझ्वः कथं आन्दोलनकारीतय्सं आः ८२म्ह सांसद व उमि दलीय शीर्ष नेता जुइगु लँपु, च्वनीगु होटल, नइगु थाय् व उमिसं ब्वति काइगु ज्याझ्वः लिसें बैठकस्थलय् तकं विरोधया ज्याझ्वः यायेगु व उमित च्वनेगु वा ज्याझ्वः यायेगु लागिं प्रदेशन्यंकं गनं नं होटल व थाय् मबीकेगु अभियान न्ह्याकेत्यंगु दु ।

उकथं हे थौं झापाया दमकय् मसाल जुलुस पिकायेगु, २८ गतेनिसें कोशी नां खोजी जागरण अभियान अन्तर्गत जिल्लाय् आमसभा, संघर्ष समिति विस्तार, तालं ग्वयेगु, कोशी नां चीकेगु, च्याकेगु, हुइगु, हाकुगु ध्वाँय् तयेगु व ८२ म्ह प्रदेशसभा सांसद बहिष्कार यायेगु घोषणा याःगु खः ।

अथे हे आन्दोलनया झ्वलय् जेठ २ निसें ५ गते तक प्रदेशया झिंप्यंगुलिं जिल्लाया मू मू थासय् जनजागरण अभियान यायेगु, जेठया निगूगु वालय् संघर्ष समितिया केन्द्र, जिल्ला व स्थानीय निकायया फुक्कं नेतृत्व पंक्तिया बृहत भेला यायेगु, आन्दोलनयात व्यवस्थित यायेत ‘पहिचानया नितिं युवा’ शक्ति दयेकेगु व प्रदेशसभाय् विशाल जनप्रदर्शन यायेगु तयारी नं याःगु दु ।

पत्रकार सम्मेलनय् न्ववासें आदिवासी जनजाति महासंघया अध्यक्ष ग्याल्जे शेर्पां थःपिंत पहिचान मबिल धाःसा दलया नेतातय् नं पहिचान मल्यंकेगु ख्याच्वः बियादिल । वय्कलं थःपिनिगु पहिचानयात मखंछु यात धाःसा दुर्घटना जुइफइगु ख्याच्वः नं बियादीगु दु ।

उकथं हे लिम्बुवान राष्ट्रिय मञ्चया नेता कुमार लिङ्देनं थःपिनि मागयात बेवास्ता यात धाःसा आन्दोलन अझ तच्वइगु ख्याच्वः बियादिल । वय्कलं थःपिनिगु माग राजनीतिक ढंगं सम्बोधन धकाः चाहे जुयागु खःसां नं मू राजनीतिक दलया नेतातय्सं मन्यनाच्वंगु धासें प्रदेशया नां पहिचानया आधारय् तयेमाः मखुसा उकिं ब्वलंकीगु संकट ग्यानापुइगु ख्याच्वः नं बियादीगु दु ।

प्रदेश १ या प्रदेशसभां वंगु फागुन १७ गते प्रदेशया नां कोशी तःगु खः । तर पहिचान पक्षधर थीथी पुचलं हाकनं नां तयेमाःगु माग यासें आन्दोलन याना वयाच्वंगु खः । आन्दोलनय् नेपाल आदिवासी जनजाति महासंघ, किरात याक्थुङ चुम्लुङ, किरात राई यायोक्खा, नेपाल शेर्पा संघ व पहिचान सहितया प्रदेश नं १ पुनः नामांकन अभियानं प्रदेश १ पुनः नामाकरण संयुक्त संघर्ष समिति दयेकाः आन्दोलन याना वयाच्वंगु खः ।