अमेरिकां लितहःगु ससुद्यःया मूर्ति प्रतिष्ठापन यायेगु तयारी
येँ(नेपालभाषा टाइम्स)/ अमेरिकां लित हःगु चन्द्रागिरी नगरपालिका तीननाथाय् च्वंगु खुयायंकातःगु ससुद्यःया मूर्ति हाकनं अन हे प्रतिष्ठापना यायेगु तयारी जुयाच्वंगु दु । तीनथानाया विष्णुदेवीया देगलं वि.सं. २०३७ सालपाखे खुया यंकूगु ससुद्यःया मूर्ति अमेरिकाय् लुइकाः अनं लित हःगु खः । लितहःगु मूर्ति छाउनीस्थित संग्रहालय् तयातःगु खःसा उगु मूर्ति न्हापा तयातःगु थासय् हे प्रतिस्थापन यायेगु निंतिं तयारी जुयाच्वंगु खँ धाःगु दु । थुकिया निंतिं मूर्ति हयेत नगरपालिकां पुरातत्व विभागलिसे समन्वय यानाच्वंगु खँ धाःगु दु ।
नेपालं खुया यंकाः विदेशय थ्यनेधुंकूगु धार्मिक, सांस्कृतिक, पुरातात्विक व ऐतिहासिक महत्वया सम्पदा पहिचान यानाः नेपाः लित हयेगु क्रमं निरन्तरता कया हयाच्वंगु झ्वलय् चन्द्रागिरि तीनाथानाया ससुद्यःया मूर्ति नं अमेरिकां लित हःगु खः ।
चन्द्रागिरि नगरपालिका १५ तीनथानापाखें तनाच्वंगु ससुद्यःया मूर्ति अमेरिकाय् लूगु खः । थनिं पीन्यादँ न्ह्यः तंगु ससुद्यःया उगु मूर्ति छ्यं मदुगु अवस्थाय्् अमेरिका लुया वःगु खः । आः उगु मूर्ति नेपाः लित हःगु खः । नेपालं थीथी इलय् खुया यंकूगु व तनाच्वंगु थीथी महत्वया सम्पदा पहिचान यानाः नेपाः लित हयेगु निंतिं पहल याना वयाच्वंगु ‘लस्ट आर्टस अफ नेपाल अभियानं’ ससुद्यःया उगु मूर्ति अमेरिकी नागरिक रोबर्ट ह्याटफिल्ड एल्सवर्थया निजी संग्रहालयय् तयातःगु खँ धाःगु दु । नेपाःया मूर्ति छम्ह अमेरिकी नागरिकया निजी संग्रहालयय् तयातःगु सीवं थीथी सरकारी निकायलिसेया सहकार्य व समन्वयय् नेपाः लित हःगु खः । नेपाः लित हःगु छ्यं मदुगु ससुद्यःया उगु मूर्ति थौंकन्हय् छाउनीस्थित राष्ट्रिय संग्रहालयय् सुरक्षित तयातःगु दु ।
थनिं करिब स्वदँ न्ह्यः उगु मूर्ति अमेरिकाय् लुया वःगु धइगु समाचार पिहां वःगु खः । उगु समाचार लिपा चन्द्रागिरि नगरपालिकां सम्बन्धित थीथी निकायलिसे समन्वय यानाः नेपाः लित हयेत ताःलाःगु खः । उगु मूर्ति अमेरिकाय् च्वनाच्वंम्ह प्रेमगोपाल महर्जनया विशेष कुतः व अग्रसरताय् वंगु मंसिर महिनाय् नेपाः लित हःगु खः । उगु इलय् अमेरिकाया थीथी संग्रहालय व थीथी व्यक्तिया स्वामित्वय् दुगु निजी संग्रहालयय् तयातःगु आपालं मूर्ति नं नेपाः लित हःगु खः । अबलय् नेपाः लित हःगु मूर्तिमध्ये यलय् च्वंगु लक्ष्मी नारायणया मूर्ति वंगु मंसिर १८ गते प्रतिस्थापन यायेधुंकूगु दु ।
७ व ८ औं शताब्दीपाखेया धयातःगु १३० सेन्टीमिटर तःधिकःम्ह ससुद्यःया मूर्ति छ्यं ध्यनातःगु अवस्थाय् लुया वःगु खः । अमेरिकाय् छ्यं मदुगु अवस्था लुया वःगु मूर्ति ९१ दशमलव ५ सेन्टीमिटरया खः ।
२०३७ सालय् खुयायंकूगु ससुद्यःया तुति धाःसा अझं विष्णुदेवी देगलय् हे दु । मुर्ति खुयायंकेगु झ्वलय् त्वःधूगु तुतिया ब्व अझं देगलय् तयातःगु दुसा खुया यंकूगु मूर्तिया थासय् न्हूगु मूर्ति दयेकाः प्रतिस्थापन याःगु खः । नेपाली प्रस्तर कलाया उगु मूर्तिया किपा सन् १९७५य् अस्ट्रियन वास्तुविद् कार्ल प्रुस्च व सन् १९८१ नेपाली अन्वेषक शुक्रसागर श्रेष्ठं कयातःगु खः ।
LEAVE YOUR COMMENTS