
विश्वास श्रेष्ठया ह्याट्रिकया ग्वाहालिं रुस्लान थ्रीस्टार फुटबल क्लब पोखराय् न्ह्यानाच्वंगु झिंखुक्वःगु आहा रारा गोल्डकप फुटबलया फाइनलय् दुहां वंगु दु ।
थौं जूगु न्हापांगु सेमीफाइनलय् थ्रीस्टारं ब·लादेशया उत्तर बरीधारा फुटबल क्लबयात ५–० गोलया तःधंगु अन्तरं बुकाः फाइनलय् थःगु थाय् पक्का याःगु खः ।
पोखरा रंगशालाय् थौं जूगु कासाय् थ्रीस्टारं न्हापांगु हाफया अन्तिम न्यागू मिनेटय् स्वंगू गोल याःगु खः । वयागु निंतिं विष्णु गुरुङं ४० औं मिनेटय् गोलया खाता चायेकूगु खः । वयां स्वंगू मिनेट लिपा हे निराजन खड्काया गोलं थ्रीस्टारं अग्रता तब्या याःगु खःसा न्हापांगु हाफया अतिरिक्त इलय् विश्वास श्रेष्ठं गोल यानाः थःगु व्यक्तिगत खाता चायेकूगु खः ।
न्हापांगु हाफ तक ३–० गोलया अग्रता कयाच्वंगु थ्रीस्टारया निंतिं निगूगु हाफया ६५ औं मिनेट व्यक्तिगत निगूगु गोल याःम्ह विश्वासं कासाया ७३ औं मिनेटय् थप छगू गोल यानाः थःगु ह्याट्रिक पूवंकूगु खः ।
थनिं छवाः न्ह्यः जक इटहरी जूगु मदन भण्डारी इटहरी गोल्डकप त्याकूगु थ्रीस्टारं आः उपाधिया निंतिं धरान फुटबल क्लब व नेपाल पुलिस क्लब दथुइ जुइगु निगूगु सेमीफाइनलया विजेता नापं म्हिती ।
LEAVE YOUR COMMENTS