ए डिभिजन लिगया खेलतालिकाय् हिउपाः

येँ – नेपाःया राष्ट्रिय टिमं बगबन्धु गोल्डकप म्हितः वनेमाःगु जूगुलिं न्यादँ लिपा न्हापांखुसी जुइत्यंगु ए डिभिजन लिगया खेल तालिकाय् हिउपाः हःगु दु । अखिल नेपाल फुटबल संघ (एन्फा), लिग कमिटीया पदाधिकारी व ए डिभिजन क्लबया प्रतिनिधितय् दथुइ सोमवाः जूगु सहलह लिपा लिगया खेलतालिकाय् हिउपाः हयेगु सहमति याःगु खः ।

आः न्हापा क्वःछिनातःकथं असोज १३ गते हे लिग उलेज्या यानाः छगू कासा जुइसा थ्व धुंकाः बगबन्धु कप जःछि लिगया कासा दिकेगु सहमति जूगु दु । बगबन्धकप असोज १४ गते निसें २६ गते तक जुइ । न्हापा नेपालं बगबन्धु कप म्हिती–मम्हिती निश्चित मजूगुलिं असोज १३ गते निसें लिग न्ह्याकेगु तालिका पिहां वःगु खः । आः बगबन्धु कप म्हितीगु पक्का जूगुलिं कासा लिछ्यायेगु सहमति याःगु खः ।

ए डिभिजन लिगया खुगू टिमय् दुथ्याःपिं कासामित राष्ट्रिय टिमय् दुथ्यानाच्वंगु दु । थुपिं कासामि बगबन्धु कप म्हितेत बंगलादेश वनकि राष्ट्रिय कासामि दुथ्याःगु क्लबतय्त समस्या जुइगु खनेदुगुलिं कासा लिछ्यायेगु सहमति जूगु खँ एन्फा महासचिव इन्द्रमान तुलाधरं धयादगिु दु । उलेज्या कासाय् एनआरटी व त्रिभुवन आर्मी दथुइ भिडन्त जुइ । आर्मीया प्यम्ह कासामि राष्ट्रिय टिमय् दुथ्यानाच्वंगु दु । लिगया न्हापांगु कासा क्वचायेवं आर्मीया विकेश कुथु, सुमन अर्याल, भरत खवास व नवयुग श्रेष्ठ राष्ट्रिय टोलीलिसें बंगलादेश वनी ।