ल्हासापाक्व ससुमांजुया बुसादँ

ख्वप – श्री महामञ्जुश्री गुरु गुथिया ग्वसालय् थनया ल्हासापाक्व ससुमांजुया बुसादँ हनेगु व छात्रवृत्ति लःल्हायेगु ज्याझ्वः जुल । तिब्बती गुरुकथं नांजाःम्ह ल्हासापाक्व ससुमांजु (श्री महामञ्जुश्री)या परम्परांनिसें न्ह्याना वयाच्वंगु बुसादँ हनेगु झ्वलय् थुगु ज्याझ्वःया ग्वसाः ग्वया वयाच्वंगु खः ।

गुथिया नायः पद्मसुन्दर शाक्यं परम्परांनिसें थुकथं श्री महामञ्जुश्री गुरुप्रति श्रद्धाभावपूर्वक बुसादँ हनेगु याना वयाच्वंगु कनादिल ।
ज्याझ्वलय् भक्तपुर सुनचाँदी व्यवसायी संघपाखें सरस्वति माविया विद्यार्थीतय् प्रयोजनया निंतिं गाडीया व्यवस्था यायेकथं छगू लख तका दां आर्थिक ग्वाहालि यानादीगु खः ।

अथे हे गुथिया नायः शाक्यं सरस्वति माविया प्यम्ह विद्यार्थीयात म्हतिं च्याद्वः तकाया ल्याखं, पञ्चकन्या माविया निम्ह विद्यार्थी व बाल्मिकेश्वर माविया निम्ह विद्यार्थीयात नं व्यक्तिगत रुपं माक्व आर्थिक ग्वाहालि यायेकथं छात्रवृत्ति लःल्हानादीगु खः ।

गुथिया नायः शाक्यया सभापतित्वय् जूगु ज्याझ्वलय् धर्मोदय सभाया नायः बौद्ध विद्वान यज्ञमानपति वज्राचायं मूपाहांकथं झायादीगु खःसा वसपोलं हे छात्रवृत्ति नापं आर्थिक ग्वाहालि नं लःल्हानाबिज्याःगु खः ।

उगु ज्याझ्वलय् वसपोलं मञ्जुश्रीया महिमा व ग्रन्थ बारे नं ध्वाथुइका बिज्याःगु खः । ज्याझ्वलय् बौद्ध विद्वान अशोकानन्द वज्राचार्य, सरस्वति माविया प्रधानाध्यापक इन्द्रमणि गिरी, प्रदीप गिरी लगायतं नुगःखँ तयादीगु खः ।