ने. सं. ११४३ तछलाथ्व दशमी -

मदनकृष्ण श्रेष्ठपाखें नं अपूर्वया विरोध

येँ (नेपालभाषा टाइम्स)- नेवाः संस्कृतियात व्यंग्य यानाः कार्यक्रम याःम्ह कमेडियन अपूर्व क्षितिज सिंहयात ख्यालि जुजु मदनकृष्ण श्रेष्ठं नं आलोचना यानादीगु दु । छगू अनलाइन न्यूज पोर्टललिसे खँ ल्हासें वय्कलं कलाकारया ज्या धइगु सकसितं छधी यानाः यंकेमाःथाय् थ्व कार्यक्रमय् समुदायया नुगलय् स्याकेगु व समुदाययात विभाजित यायेगु ज्या जूगु द्वपं बियादीगु दु । सुं नं समुदाययात चोट लाकीगु खँ तयाः न्हीकेगु ज्या याये मजिउ धासें वय्कलं अपूर्वया ज्याझ्वः न्यने तक हे मफइ कथं वाइयात जूगु बिचाः नं तयादीगु दु ।

अपूर्वया पक्षय् दुपिं कलाकारतय्सं धाःसा वयागु प्रस्तुति त्रुटिपूर्ण खः धकाः स्वीकार यासें वयात छकःया लागिं क्षमा बीमाःगु बिचाः सार्वजनिक यानाच्वंगु दु । थ्वहे झ्वलय् म्हिगः अपूर्व सिंहया अबुं नेवाः अभियन्तातय्त नापलानाः अपूर्वयात क्षमा बीत इनाप याःगु दु । अपूर्वं नेवाः समुदाययात नुगलय् स्याकाः गल्ती याःगु खः धासें वय्कलं मसीकं याःगु गल्तीया लागिं छकःयात क्षमा बीत इनाप यानादीगु खः ।

नेवाः अभियन्तातय्सं वय्कःयात अपूर्वयात तःधंगु हे सजाय बीगु थःपिनि मनसाय मखु धासें वयागु नजिर स्वयाः मेपिंसं नं थ्व शिक्षा कायेमा धकाः जक थःपिंसं थ्व पलाः ल्ह्वनागु खः धकाः आश्वासन बिउगु खः । नेवाः समाजयात हिस्यायेगु ज्या यक्व हे जूगु व थःपिंसं यक्वसित क्षमा बीधुनागु खःसां थज्याःगु प्रवृत्ति अप्वयाच्वंगुलिं थःपिं प्रतिकारय् कुहां वयेमाःगु खँ नं ध्वाथुइकेगु ज्या जूगु खः ।