ने. सं. ११४४ ञलाथ्व नवमी -

किलागःया दीप्याखंया कोषयात कयाः सलहल मुँज्या

येँ – नेपाःया म्हसीका जुयाच्वंगु थनया मूर्त अमूर्त संस्कृति व सम्पदाया संरक्षणय् सकलें छधी जुइमाःगुलिइ जनप्रतिनिधिपिंसं बः बिउगु दु । येँयाःया झ्वलय् येँया किलागलं पिकाइगु दीप्याखं व आगं छेँया संरक्षणया सम्बन्धय् ग्वसाः ग्वःगु विचार गोष्ठीइ जनप्रतिनिधिपिंसं स्थानीय संस्कृति, सम्पदाया संरक्षणय् छधी जुइगु प्रतिवद्धता प्वंकूगु खः ।

ज्याझ्वलय् वाङ्मय शताब्दी पुरुष संस्कृतिविद् डा. सत्यमोहन जोशीं दीप्याखंया ऐतिहासिक व सांस्कृतिक पक्षया कयाः कुलादीगुस खः । दीप्याखंलिसें थीथी द्यःप्याखनं सभ्य व सुसंस्कृत समाज दयेकेत नैतिक शिक्षा नं बीगु जूगुलिं थुकिया महत्व ल्याय्म्ह पुस्तायात थुइका बीमाःगु डा. जोशीया धापू खः । थुकिया संरक्षणया नितिं आर्थिक पक्ष बल्लायेमाःगुलिइ नं जोशीं बः बियादिल ।

येँ महानगरपालिकाया प्रमुख विद्यासुन्दर शाक्यं वर्तमान इलय् संस्कृति व सम्पदाय् अतिकं राजनीतिकरण जुयाच्वंगु धासें थुकिया संरक्षणया लागिं राजनैतिक भावना स्वयां थहांवयेमाः धयादिल । ‘स्थानीय संस्कृति, सम्पदा संरक्षणया लागि यक्व यायेगु इच्छा दु, योजना नं दु ।

तर, जब योजना कार्यान्वयनय् हयेत न्ह्यज्याये, दलीय भावनां प्रेरित जुयाच्वंपिंसं अदालतय् उजुरी तयाः लँ पनाबी अले इमिसं हे मेयरं छुं मयाः धयाजुइ’, प्रमुख शाक्यं दुःख प्वंकुसे धयादिल, ‘थनया दक्वं संस्कृति, सम्पदा थःगु हे खः धइगु थुइकाः थुकिया संरक्षणया लागिं सकलें छधी जुयाः सहकार्य याये फयेकेमाः । दीप्याखं, थुकिया आगंछेँ लिसें थनया स्थानीय संस्कृति सम्पदा संरक्षणया लागिं येँ महानगरपालिकापाखें छुं नं कथंया कुतः ल्यं तयेमखु ।’

सांसद् रामवीर मानन्धरं थनया स्थानीय संस्कृति, सम्पदाया संरक्षणया लागिं थः सांसद्तय्गु छगू संजाल दयेकेगु योजनाय् न्ह्यज्याः वनाच्वनागु धयादिल । संस्कृतिया संरक्षण याये फतधाःसा जक समुदायया नं संरक्षण जुइगु धासें वय्कलं दीप्याखंया कोषया लागिं व्यक्तिगत ५०द्वः तका ग्वाहालि यायेगु घोषणा यानादिल ।

अथे हे पुलांम्ह राज्यमन्त्रीलिसें राजनीतिज्ञ तीर्थराम डंगोलं आः स्वनिगःया नेवाःतय्सं द्यः क्वबीगु मखु, देय् क्वबीगु स्वयेमाः धयादिल । वय्कलं धयादिल, ‘द्यःया रथ सालेगु मखु, देय् सालेमाः । अले जक थनया संस्कृतिया संरक्षण बांलाक जुइफइ ।’

दीप्याखं व थुकिया आगंछेँया संरक्षण, संवद्र्धनया लागिं आर्थिक ग्वाहालि मुंकेगु उद्देश्यं जूगु ज्याझ्वलय् उपस्थित जनप्रतिनिधिपिं, संस्कृतिप्रेमी सर्वसाधारणपाखें यानाः छन्हुया दुने २० गू लख आर्थिक ग्वाहालि मुंगु जानकारी ज्याझ्वलय् बिउगु खः । थुकी मेगु ध्यबा थप यानाः यंकाः दीप्याखंया आगंछेँ जिर्णोद्धारनापं व्यवस्थापनया लागिं ज्या याना वनेगु दीप्याखं (देवी नाच) प्रवद्र्धन तथा संरक्षण समितिं न्ह्यथंगु दु ।