ल ज्वःगु देगःया मर्मत सम्भार शुरु

येँ – पुनःनिर्माण सम्पन्न जूगु निला मदुनिवं लः ज्वया वयेगु शुरु जूगु निगः देगःया मर्मत सम्भारया ज्या न्ह्याःगु दु । तःभुखाचं दुना क्षतिग्रस्त जूगु देगः पुनःनिर्माण सम्पन्न जुइवं देगलय् लः ज्वयेगु शुरु जूगु खः ।येँय् नं उत्तरय् लाःगु सक्वय् च्वंगु लिच्छवीकालीन देगः तःभुखाचं क्षतिग्रस्त जुइवं पुनःनिर्माण याःगु खः ।

तर पुनःनिर्माण सम्पन्न जुइवं थनत्वंगु राम झुपडी कृष्ण देगः व नारायण द्यःया देगलं लः ज्वयेगु शुरु जूगु खः ।थ्व सम्बन्धय् शंखरापुर नगरपालिका वडा नं. ७ य् च्वंगु ऐतिहासिक, धार्मिक, सांस्कृतिक व पुरातात्विक ल्याखं महत्वपूर्ण राम मन्दिरया पुनःनिर्माण गुणस्तरीय मजूगु समाचार पिहां वयेवं पुरातत्व विभागं सम्बन्धित निर्माण व्यवसायीयात पौ च्वयाः थुकिया बारे जानकारी काःगु खः ।

लः ज्वःगुलिं देगःया सिँ ध्वगिना वनीगु जूगुलिं लः मज्वइकथं मर्मत सम्भार यायेत विभागं निर्माण कम्पनीयात निर्देशन बिउगु खः ।
तःभुखाचं क्षतिग्रस्त देगः पुनःनिर्माणया निंतिं विभागं टेन्डर आह्वान याःगु खःसा गुप्ती कन्स्ट्रक्सनं ३५ गू लाख तकां देगः पुनःनिर्माण यायेगु ठेक्का काःगु खः ।

तर देगः पुनःनिर्माण यायेबलय् उकिया सुचं संलग्न यानाः देगः निर्माणस्थलय् तयेमाःगु सुचनाया जानकारी मबिउगु, देगः दयेकूसां गुणस्तरहीन जुइक ज्या याःगु, कानुनी व्यवस्थाकथं तयेमाःगु जानकारी छुं नं मबिउगु धासें स्थानीयवासीतय्सं थ्व सम्बन्धय् असन्तुष्टि प्वंकूगु खः ।

अथे हे विभागं सक्वया हे वडा नं. ६ लय् च्वंगु नारायण द्यःया देगः पुनःनिर्माणया निंतिं नं ३५ गू लाख तका दामं हे मिलिजुली कन्स्ट्रक्सनयात ठेक्का बिउगु खः । उगु देगःया पुनःनिर्माण सम्पन्न जुइवं देगलय् लः ज्वयेगु शुरु जूगु जूगु खः ।

थ्व सम्बन्धय् विभागं सम्बन्धित निर्माण कम्पनीयात पत्राचार देगलय् लः मज्वइकथं मर्मत सम्भार यानाः उकिया जानकारी विभागयात बी धुंकाः धरौटी लित कायेत पत्राचार याःगु खः ।

विभागया इन्जिनियर पूर्णबहादुर श्रेष्ठं सम्बन्धित निर्माण व्यवसायीयात लः मज्वइकथं मर्मत सम्भार याये धुंकाः जक धरौटी लित कायेत धासें यदि उकथं ज्या मजुल धाःसा धरौटी जफत यायेगु जुइ धासें पत्राचार यानागु जानकारी बियादीगु दु ।