सतक विस्तारय् आईएलओ सक्रिय

नेपाःया सतक विस्तार विरुद्ध राष्ट्र संघय् कारवाही

येँ – नेपाःया थीथी लागाय् थौंकन्हय् जुयाच्वगु सतक विस्तारया ज्याय् राष्ट्र संघीय निकाय अन्तर्राष्ट्रिय श्रम संगठन आईएलओपाखें थःगु सरोकार क्यंगु दु ।सतक विस्तारया नामय् स्वनिगःया स्थानीय नेवाः आदिवासी जनजातियात उठिबास यायेत स्वयाच्वन धइगु द्वपं बिसें लाःगु मुद्दाय् आईएलओपाखें थ्व सरोकार क्यंगु खः ।

सतक विस्तारया नामय् जुयाच्वंगु थ्व ज्या आईएलओ महासन्धि १६९ या उल्लंघन खः धासें श्रम संगठनं थ्व सरोकार जाहेर याःगु खः । सूत्रतय्सं धाः कथं नेपाःया थीथी लागाय् जुयाच्वंगु सतक विस्तारया ज्या कानुनी रुपं नं पाय्छि मजू धकाः सर्वोच्च अदालतं समेत फैसला यायेधुंकूगु अवस्थाय् सरकारं प्रहरी लगे यानाः हानं छेँ थुनेगु ज्या यानाच्वंगु खँय् नं संगठनं चिउताः प्वंकूगु दु ।

सर्वोच्च अदालतं याःगु फैसलायात उल्टे यायेत सरकारं पुनरावलोकनया लागिं निवेदन बियातःगु दु । थ्व निवेदन बीगु ज्या नं आदिवासी जनजातिया अधिकार विरुद्धया पलाः खः धाःगु दु । अन्तर्राष्ट्रिय श्रम संगठनया नियम कथं आदिवासी जनजातियात जुयाच्वंगु थज्याःगु छुं नं मुद्दाय् उजुरी तयेगु खःसा न्ह्यागुसां छगू ट्रेड युनियन मार्फत वयेमाः ।

नेपाःया सतक विस्तार सम्बन्धी थ्व मुद्दायायात नेपाल टेलिकमया कर्मचारी युनियन मार्फत न्ह्यःने न्ह्याकेगु ज्या जूगु खः । आईएलओ १६९ या ज्याकूपाखें आः नकतिनि टेलिकमया कर्मचारी युनियनयात छपु पौं छ्वया हसें युनियनं तःगु उजुरीयात कार्यान्वयनया प्रक्रियाय् छ्वयेधुनागु जानकारी बियातःगु दु ।

आईएलओ १६९ संस्थापाखें न्ह्याकूगु थ्व पलाःया कारणं आः नेपाःया सतक विस्तारं स्थानीय जनतायात लाकूगु लिच्वः अन्तर्राष्ट्रियकरण जूगु दु ।

त्रिपक्षीय पुचःपाखें छानबिन ?

अन्तर्राष्ट्रिय श्रम संगठनं थःपिनि प्रक्रिया न्ह्याकाः सुचारु जुया वन धाःसा छगू त्रिपक्षीय पुचः गठन यानाः सतक विस्तारया ज्या याये जिउगु खः लाकि मखु धकाः छानबीन समेत याके फुगु खँ धाःगु दु । आईएलओ १६९ ज्याकूपाखें आः अज्याःगु पुचः गठनया सम्भावना समेत खुले याःगु दु ।

नेपाःया सरकारपाखें थुकिया बारे छुं सुनुवाई मयाःगु व मेखे अदालतं समेत थ्व ज्या कानूनसम्मत मजू धकाः याःगु फैसलायात आईएलओ १६९ या ज्याकुथी महत्वपूर्ण कडीया रुपय् काःगु दु । सतक विस्तार विरुद्ध सम्बद्ध पीडिततय्सं सांगठनिक आन्दोलन हे न्ह्याकाच्वंगु दु ।