आः विमान दुर्घटनाय् बीमा अप्वः

वमान दुर्घटनाय् लानाः सीपिं नेपाःमितयात च्यादुगं क्षतिपूर्ति

येँ – छुं नं कथंया विमान दुर्घटनाय् लानाः सुं नेपाःमि मंत धाःसा बीमा वापत वइगु दां विदेशी यात्रु व नेपाःमि यात्रुयात फरक जुइगु जुयाच्वंगु दु । अथे जूगुया कारण नेपालं हवाई दुर्घटना सम्बन्धी मोन्ट्रियल सन्धियात अनुमोदन मयाःगुलिं खः । आः नेपालं नं उगु सन्धि अनुमोदन यायेगु तयारी यानाच्वंगु खँ सीदुगु दु ।

सूत्रतय्सं धाः कथं नेपालं मोन्ट्रियलय सन्धियात अनुमोदन यायेवं हवाई दुर्घटनाय् लानाः सीपिं नेपाःमि यात्रुतय्त वइगु बीमाया रकम थौंकन्हय् स्वयां च्यादुगं (८ गुणा) अप्वः जुइ ।

छुं नं हवाई दुर्घटनाय् लानाः सीम्ह नेपाःमि यात्रुयात थौंकन्हय् बीगु बीमाया रकम धइगु २० हजार डलर जक खः । मेगु देशया यात्रुतय्त लखौं डलर क्षतिपूर्ति वःसां नेपाःया यात्रुतय्त धाःसा २० हजार डलर जक वइ । आः नेपालं मोन्ट्रियल सन्धिइ हस्ताक्षर यात धाःसा हवाई दुर्घटनाय् लानाः सीम्ह नेपाःमि यात्रुयात १ लाख ६० हजार डलर बीमा वापतया क्षतिपूर्ति रकम ल्हातय् लाइ ।

उकथं हे हवाई यात्राया झ्वलय् सुं यात्रुयात लगेज तन धाःसा उकिया क्षतिपूर्ति नं वयात प्राप्त जुइ । अज्याःगु लगेज वापत प्रति किलो २० डलरया ल्याखं ध्यबा वइगु खँ धाःगु दु । मोन्ट्रियल सन्धिइ हस्ताक्षर जुल धाःसा यात्रुतय्सं उडान ढिला जूगु खँय् समेत थःत जूगु क्षतिया दावी यानाः क्षतिपूर्ति काये फइगु खँ धाःगु दु ।

थ्व क्षतिपूर्तिया प्रावधान विदेशय् उडान याइगु नेपाःया विमानतय्त जक लागू जुइ । लिसें विदेशं नेपाः वइगु विमानय् नं लागू जुइ । आन्तरिक उडानया विमानय् धाःसा थ्व प्रावधान लागू जुइ मखु । थ्व सन्धिइ थौंकन्हय् विश्वया १३१ गू देश आवद्ध जुइधुंकूगु दु । आः नेपाःया संसदय् थ्व सन्धि अनुमोदन यायेत थ्यनाच्वंगु दु ।

युएस बंगला दुर्घटना लिपाया पहल

हवाई उडानय् लानाः सीपिं नेपाःमि यात्रुतय्त बीमाःगु क्षतिपूर्तिया रकम अप्वयेकेमाःगु खँय् दकलय् अप्वः सः थ्वःगु छुं ई न्ह्यः नेपालय् जूगु युएस बंगालया विमान दुर्घटनाया इलय् खः । उगु विमान दुर्घटनाय् लानाः नेपाःया आपालं यात्रुत सीगु खः । तर बीमाया क्षतिपूर्ति धाःसा नेपाःया मृतक यात्रु स्वयां नं बंगलादेश व मेमेगु देशया यात्रुतय्त अप्वः वयेवं नेपाःमितय्सं उकिया कडा आलोचना याःगु खः । वयां लिपा नेपालं नं बीमा रकम अप्वयेकेगु लागिं पहल शुरु याःगु खः । युएस बंगला विमान दुर्घटनाय् लाःपिं आपालं यात्रुतय्सं आः तकं क्षतिपूर्ति धाःसा काये मखंनि ।