प्रियंकाया पार्टीइ दीपिका मथ्याः

बलिउड हिरोनी प्रियंका चोपडा व अमेरिकी गायक निक जोन्सं आखिर थःपिनि रिलेशनयात स्वीकार यासें छगू तःधंगु पार्टी हे बिउगु दु । शनिवाः प्रियंका व निकं इन्गेजमेन्टया भारतीय पंजाबी परम्परा कथं ‘रोका’ ज्याझ्वः यानाः थः छेँजःपिं व सतिपिं पासापिंत पार्टी बिउगु खः । थ्व ज्याझ्वःया निंतिं निकया परिवार नं भारत वःगु खः ।

प्रियंकाया पार्टीइ बलिउडया यक्व हे सेलिब्रटीत थ्यंसां दीपिका पाडुकोण धाःसा मथ्यंगुलिं चर्चा जुयाच्वंगु दु । थ्व पार्टी प्रियंकां दीपिकायात सः हे मसःतू । बलिउडया यक्व हिरोनीतय् दथुइ थःथवय् मिले मजूसां प्रियंका व दीपिका धाःसा मिले जूपिं खः । उपिं निम्हेसिया दथुइ छुं विवाद नं वयाच्वंगु मदु । अय्सां प्रियंकां दीपिकां ब्याहा यायेत्यंम्ह रणवीर सिंहयात धाःसा सःतल दीपिकायात धाःसा मसतल । अथे जुइबलय् थुपिं निम्ह दथुइ नं छुं विवाद पिहां वल ला धकाः बलिउडय् चर्चा सुरु जूगु दु ।