ने. सं. ११४३ चौलाथ्व पारू -

विज्ञापन विधेयक उपभोक्ताया हीतय् दुगु दावी

येँ – सञ्चार तथा सूचना प्रविधिमन्त्री गोकुलप्रसाद बाँस्कोटां विज्ञापन नियमत यायेगु समबन्धय् व्यवस्था यायेत दयेकूगु विधेयक उपभोक्तातय् हिकहितय् दुगु दावी यानादीगु दु । संसदया विकास तथा प्रविधि समितिया बैठकय् विधेयकयात कयाः जूगु दफावार सहलहय् सांसदतय्गु न्ह्यसःया लिसें बिसें मन्त्री बाँस्कोटां थ्व विधेयक उपभोक्तातय् हिकहितय् दुगुलिं गुलि फु उलि याकनं संसदय् यंकेगु प्रक्रिया न्ह्याकेमाःगु खँ धयादीगु खः ।

बैठकय् वय्कलं धयादीगु दु, ‘न्हापा विज्ञापन धयागु जानकारी बीगु माध्यम जक जुयाच्वंगु खः, आः विज्ञापन बजार जुइधुंकूगु दु । थ्व आयआर्जनया क्षेत्र नं खः । थुकिया बजाः नं अप्वया वनाच्वंगु दु । थ्व विधेयक ऐन जुयाः कार्यान्वयनय् वन धाःसा नेपाःया विज्ञापन बजाः अझ अप्वइ ।’

विधेयकय् विदेशी च्यानल विज्ञापन रहित यायेमाःगु क्लिनफिडया खँ नं दुथ्यानाच्वंगुलिं टेलिभिजन प्रशारकतय्सं थुकिया विरोध यानाच्वंगु दु । थ्व विधेयकय् हार्डिङ्ग बार्डपाखें विज्ञापन यायेत अनुमति कायेमाःगु, विज्ञापन यायेत निषेध क्षेत्र घोषणा यायेदइगु, विज्ञापन बोर्डया गठन, बोर्डया काम, कर्तव्य व अधिकार लगायतया विषयत दुथ्याकातःगु दु ।

होर्डिङ्ग बोर्ड, रेडियो, टेलिभिजन, पत्रपत्रिका लिसें न्हूगु मिडियापाखें प्रकाशन प्रसारण जुइगु विज्ञापनया नियमन यायेदइगु व्यवस्था नं विधेयकय् यानातःगु दु । नेपालय् विज्ञापनया बजाः थौंकन्हय् ३० अर्ब निसें ५० अर्ब तकया दुगु अनुमान दु ।

थ्व मध्ये दकलय् अप्वः ब्व छापा माध्यमया मिडियाय् दु । छापा माध्यमया मिडियां मुक्कं विज्ञापन मध्ये थ्यंमथ्यं ४७ प्रतिशत थःगु ल्हातय्लाकातःगु दु । थ्व धुंकाः रेडियो व टेलिभिजनय् १९–१९ प्रतिशत दुसा डिभिटल माध्यमय् ५ प्रतिशत, बिलबोर्ड व मेमेगु ख्यलय् १० प्रतिशत दु ।