श्रीबच्छ महािवहारया आजु छेँया उलेज्या
यल- श्रीबच्छ महाविहार आजु निवास उपभोक्ता समितिया ग्वसालय् ज्येष्ठ नागरिक गृह आजु छेँया उलेज्या जुल । महाविहारया युवराज शाक्यया सभापतित्वय् जूगु ज्याझ्वलय् आजु छेँया उलेज्या मूपाहां महाविहारया हे थपाः आजु ९१ दँया आशाकाजी शाक्यं यानाबिज्याःगु खः ।
उपभोक्ता समितिया नायः शाक्यं लसकुस यानादीगु ज्याझ्वलय् विशेष पाहां समाजसेवी नापं ललितपुर विकासको लागि समाजया नायः बुद्धिराज वज्राचार्यं समाजया संयोजनय् यल महानगरपालिकाया प्राविधिक ग्वाहालिइ महाविहारया कोष नापं स्थानीयवासिन्दा व भारतीय दूतावासया ग्वाहालिं निर्माण जूगु ज्येष्ठ नागरिक गृह आजु छेँ च्वछायेबहगु ज्या जूगु धासें प्रशंसा यानादीगु खः ।
उपभोक्ता समितिया छ्यांजे इन्द्रमुनि शाक्यं आजु छेँ निर्माणया प्रतिवेदन नापं आजु छेँया अवधारणा न्ह्यब्वयादीगु खः । लिसें वय्कलं थौंकन्हय्या ल्याय्म्ह पुस्तात अप्वःथें विदेश वनेगु व छेँया मेपिं दुजःपिं नं सुथंनिसें थःगु ज्याय् व्यस्त जुयाच्वनेमालीगुलिं छेँय् ज्याथजिथिपिं जक दयाच्वनीगुलिं इमिगु निंतिं सामाजिक, धार्मिक व स्वास्थ्य परीक्षणया नं व्यवस्था यायेकथं आजु छेँ संचालनय् हयागु खः धयादिल ।
ज्याझ्वलय् उपभोक्ता समितिया दांभरिं उत्तमराज शाक्यं मुक्कं ७१ गू लाख तका दामं उगु छेँ निर्माण जूगु ल्याःचाः न्ह्यब्वयादीगु खः । बौद्ध विहार संघ, यलया नायः पुष्परत्न शाक्यं आजु छेँया निर्माण धाथें छगू च्वछायेबहगु ज्या खः धासें संघपाखे नं पूmचाःगु ग्वाहालि यायेत तयार दु धयादिल ।
श्रीबच्छ महाविहार सुधार समितिया नायः समिनराज शाक्यं, यल मनपा वडा नं. २० या सचिव माधवराज सिल्वाल, उपभोक्ता समितिया दुजः प्रेमबहादुर शाक्यं नं थःथःगु नुगःखँ तयादीगु ज्याझ्वलय् दातापिंत खादा क्वखायेका सम्मान नं याःगु खः ।
LEAVE YOUR COMMENTS